Од кого е подобро да се побара совет за заштита ако не од лекарите? Еве што прават тие и другите здравствени работници за да се заштитат од коронавирусот – како себе така и другите.
- ГИ МИЈАТ РАЦЕТЕ
Никој не смее да ја прескокнува оваа навика, било да се работи за обичен човек, било да е лекар. Тоа значи кога било и каде било. „Работата е во претпазливоста“, нагласува д-р Наташа Бујан, семеен лекар. Тоа значи миење на рацете со сапун и вода најмалку 20 секунди без притоа да ја прескокнете областа под ноктите. Д-р Бујан ги мие рацете секогаш кога влегува во нов простор, куќа, канцеларија или продавница. Ако немате пристап до сапун, користете средства за дезинфекција или гелови.
- НЕ ГО ДОПИРААТ ЛИЦЕТО СО РАЦЕ
Ова претставува проблем и за лекарите, а една студија покажала дека студентите по медицина во просек го допреле лицето со рацете 23 пати во рок од еден час. Ако го изброиме бројот на часови во текот на денот, јасно е колкави се шансите за инфекција. Велат дека допирањето на лицето со рацете е како да сте им посакале добредојде на вирусите бидејќи тие најлесно ќе влезат во телото преку носот или устата. Ако вирусот е на вашите раце, а вие го допирате лицето, тој лесно ќе стигне до вашите бели дробови.
- КИВААТ И КАШЛААТ ВО ХАРТИЕНО МАРАМЧЕ
Секој пат кога ќе кивнете направете го тоа во хартиено марамче или доколку немате во моментот, кивнете во лактот. Американскиот центар за превенција и контрола на болести советува веднаш да го фрлите марамчето во ѓубре, за да не стигне до некој друг. Ако, пак, сте кивнале во дланката, веднаш измијте ги рацете со вода и сапун.
- СЕ ПОЗДРАВУВААТ БЕЗ ДОПИР
Лекарите за поздравување ги користат лактите, а некои тоа го нарекуваат ново ракување. Причината треба да биде логична – лактите не се дел од телото со кој лесно може да се пренесе вирусот, за разлика од ракувањето. Со лактите нема да го допрете лицето. „Не се ракувам со пациентите, ги поздравувам со очите или топла насмевка и мислам дека тоа е доволно“, вели д-р Бујан.
- СПИЈАТ ДОВОЛНО
Д-р Бујан внимава на својата исхрана и вежбање, дури и кога нема епидемија. Но, исто така внимава и да спие доволно и смета дека ова е многу важна навика – да легнете во исто време секој ден, да бидете сигурни дека спиете 8 часа и да не ја проверувате електронската пошта пред спиење. Доволно сон може да го зајакне вашиот имунолошки систем. Во моментов, околу 80 проценти од случаите на инфекција се многу лесни, а некои луѓе дури нема да имаат симптоми. Доколку доволно спиете, вашето тело ќе биде подобро подготвено за борба против вирусот.
- КОРИСТАТ СРЕДСТВА ЗА ДЕЗИНФЕКЦИЈА
Иако е потврдено дека вирусот се шири преку капки, кашлање или кивање, новите податоци укажуваат на тоа дека може да преживее неколку дена на тврди површини. На овој начин лесно можете да го допрете вирусот со рацете и да го пренесете до носот или устата. Лекарите се потпираат на средствата за дезинфекција, со кои го пребришуваат работното биро или столот, па затоа советуваат да ги имате секогаш при рака.
- НОСАТ МАСКИ КОГА Е ПОТРЕБНО
Докторите во Америка се замолени, исто како и сите други, да внимаваат на користењето на маски за да има за сите на коишто им се потребни, па така, на пример, не ги носат ако се дома со своето семејство. Маските нема да ги заштитат луѓето од инфекции, според зборовите на д-р Вилијам Шафнер, специјалист за заразни болести. Сепак, можат да бидат од корист и да го запрат ширењето на симптомите од страна на заразеното лице. Ако е некој болен, треба да остане дома. Пациентите за кои е потврдено или се сомневаат дека се заразени, треба да носат маска додека не се изолираат или хоспитализираат, според Американскиот центар за контрола и превенција на болести.
- ИНСИСТИРААТ ПАЦИЕНТИТЕ СО СИМПТОМИ ПРВО ДА ГИ КОНТАКТИРААТ ТЕЛЕФОНСКИ
Ова е затоа што не сакаат некој со симптоми да престојува во чекалницата меѓу другите пациенти. „Пациентите можат да разговараат со својот лекар по телефон за нивните симптоми и да се договорат за следниот чекор и да го спречат ширењето на вирусот“, наведува лекарот. Ако симптомите можат да се третираат и во сопствениот дом, тогаш е попаметно да се избегнува посетата на лекар.
- НЕ КРЕВААТ ПАНИКА
Лекарите не се во состојба на постојана паника поради појавата на вирусот, ниту некој од нас би требало да биде, а д-р Бујан смета дека би било паметно да се намали времето поминато на социјалните мрежи бидејќи тие имаат влијание врз нашата душевна состојба.
- ШТО ПРАВАТ БОЛНИЧКИТЕ УСТАНОВИ?
Постојат процедури кои се воспоставени за да се заштитат пациентите кои доаѓаат во нив. Ако постои сомневање за заразено лице, се носи во просторија за изолација. Вработените во болницата се подложени на мерки за контрола на инфекциите. Заштитни очила, ракавици и маски се на располагање на медицинскиот персонал.
