„Витаминот Д треба да се комбинира со пробиотици за да се подобри цревната флора. Треба да се додаде цинк и селен, фолна киселина. Овие се многу важни состојки кои ја подобруваат состојбата на имунолошкиот систем
Зајакнувањето на имунитетот треба да претставува секојдневна грижа, а не само во кризни здравствени ситуации, како што е епидемијата на коронавирус. Природно е што многумина се интересираат за оваа тема, па затоа бараат одговори на разни страни. Има многу непроверени и несигурни информации, совети и препораки.
Проф. д-р Борислав Каменов, имунолог, вели дека за да се зајакне имунитетот, важно е да се земаат витамини Ц и Д секој ден, како и цинк и селен.
„Имунитетот се гради цел живот. Дури се гради и пред раѓањето за време на престојот во мајчината утроба… Треба да поминат неколку недели за да се подигне нивото на витамин Д. Потребно е време да се подигне овој витамин во организмот“, објасни д-р Каменов во емисијата „150 минути“ на српска Прва ТВ.
Докторот појаснува дека витаминот Д може да се зема во текот на целата зима, а препорачува да се комбинира со пробиотици.
„Витаминот Д треба да се комбинира со пробиотици за да се подобри цревната флора. Треба да се додаде цинк и селен, фолна киселина. Овие се многу важни состојки кои ја подобруваат состојбата на имунолошкиот систем“.
„Витаминот Д не се внесува само преку храна, тој се внесува и преку сонцето. Кога нема доволно сонце, ние сме во еден голем дефицит и мора да го зајакнеме со додатоци и тоа е спасоносно“, истакнал тој и уште еднаш посочил дека цревната флора игра клучна улога во силниот имунитет.
„Труењето оди преку цревата, системот е страшно оптоварен со отрови и тоа можеме да го намалиме со употреба на пробиотици. Оптоварени сме со отрови, лоша храна, вируси и ако не ја намалиме пропустливоста на цревата и не ја поправиме слузокожата, тогаш ќе ја доведеме нашата отпорност под голем знак прашалник. Што значи дека полесно ќе подлегнеме не само на COVID-19, туку и на сите други вирусни инфекции и настинки“.
Зборувајќи за храната и за тоа дали во неа има природни пробиотици, тој вели дека има, дека постојат и многу луѓе го знаат тоа. Меѓутоа, кога некој има проблем, природните пробиотици не помагаат.
Тој вели дека, на пример, киселата зелка, ферментираната храна што традиционално ја јадеме, има пробиотици кои им помагаат на нормалните бактерии да преживеат.
„Пробиотиците нè штитат од вируси… и тие со витаминот Д делуваат комплементарно“, порачува имунологот, додавајќи дека треба да се читаат декларациите, бидејќи одредени препарати може да бидат „поприлично штетни“.
