Д-р Билјана Ивановска-Аџиевска: АЛЕРГИИ НА ОЧИТЕ КАЈ ДЕЦАТА

Вируси, бактерии, различни иритирачки супстанци (шампони, прашина, чад, хлор од базени...) или различни алергени (полен, спори од мувли и др.) можат да предизвикаат конјунктивит. Црвеното око предизвикано од вируси и бактерии може лесно да се пренесе од едно лице на друго, но не претставува сериозен здравствен ризик, ако се дијагностицира навремено, додека алергискиот конјунктивит не е заразен. Заради тоа, важно е навреме да се открие дали конјунктивитот е предизвикан од алергии или инфекција

Конјунктивитот е една од највообичаените и најчесто третираните очни болести кај децата: Д-р Билјана Ивановска-Аџиевска, специјалист офталмолог

ПИШУВА:
Д-р Билјана Ивановска – Аџиевска

специјалист офталмолог

 

Пролетта е сезоната на поубаво време и нови почетоци, но новите растенија кои се појавуваат секоја пролет можат да бидат причина за појава на сезонски алергии на очите кај децата. Тие можат да предизвикаат конгестија, главоболки, чешање и отоци на очите. Конјунктивитот е една од највообичаените и најчесто третираните очни болести кај децата. „Црвеното око“ како што често се нарекува, претставува воспаление на конјунктивата,која е провидната мембрана која ја препокрива внатрешната страна на капаците и белката на окото и ја одржува влажноста на окото.

СЕЗОНСКИ АЛЕРГИИ Новите растенија кои се појавуваат секоја пролет можат да бидат причина за појава на сезонски алергии на очите кај децата
Честопати е многу тешко да се идентификува причинителот на алергијата. Најчестите се: поленот од дрва или треви, спори од мувли, домашна прашина, домашни животни (кучиња, мачки, глодари…). Контактот со одредени растенија (пр. коприви), храна (јагоди, млеко, кикиритки…) или пак инсекти можат да предизвикаат алергиска реакција на кожата, вклучително и на очните капаци. Алергијата може да се појави при првиот контакт со специфичен тригер или пак да се развие после неколку експозиции

Вируси, бактерии, различни иритирачки супстанци (шампони, прашина, чад, хлор од базени…) или различни алергени (полен, спори од мувли и др.) можат да предизвикаат конјунктивит. Црвеното око предизвикано од вируси и бактерии може лесно да се пренесе од едно лице на друго, но не претставува сериозен здравствен ризик, ако се дијагностицира навремено, додека алергискиот конјунктивит не е заразен. Заради тоа, важно е навреме да се открие дали конјунктивитот е предизвикан од алергии или инфекција, бидејќи секоја од овие состојби кај децата има различен третман.

Кои се симптомите на алергиско црвено око?

Децата честопати не можат точно да ги опишат проблемите кои ги имаат со очите. Заради тоа важна е опсервацијата на одредено однесување или пак симптоми на очите за да може точно да се дијагностицираат очните алергии. Најчести симптоми се:

  • Често триење и чешање на очите (честопати и на носот и кивање);
  • Зачестено и засилено трепкање или вртење на очите нагоре, како одговор на нелагодноста која ја чувствуваат во очите;
  • Црвенило на белката или на внатрешната страна на капаците;
  • Зголемено солзење;
  • Оток на капаците;
  • Нагласени/темни подочници.

Овие симптоми се обично присутни на двете очи, иако не во иста мерка.

ПРИЧИНИТЕЛ Важно е навреме да се открие дали конјунктивитот е предизвикан од алергии или инфекција, бидејќи секоја од овие состојби кај децата има различен третман

Кои се најчестите причинители на алергии кај децата?

Честопати е многу тешко да се идентификува причинителот на алергијата. Најчестите се: поленот од дрва или треви, спори од мувли, домашна прашина, домашни животни (кучиња, мачки, глодари…). Контактот со одредени растенија (пр. коприви), храна (јагоди, млеко, кикиритки…) или пак инсекти можат да предизвикаат алергиска реакција на кожата, вклучително и на очните капаци. Алергијата може да се појави при првиот контакт со специфичен тригер или пак да се развие после неколку експозиции.

Децата честопати не можат точно да ги опишат проблемите кои ги имаат со очите. Заради тоа важна е опсервацијата на одредено однесување или пак симптоми на очите за да може точно да се дијагностицираат очните алергии

Како се третира сезонската алергија на очите?

Црвеното око предизвикано од алергија може целосно да исчезне доколку алергијата се третира со лекови/капки или ако се отстрани алергенот. Значи, прва линија на третман е отстранување на алергенот, што може да вклучува, на пример, носење капа надвор или често миење на лицето.

Очниот лекар пак може да препише некои од следниве лекови:

  • Очни деконгестиви: капки кои го намалуваат црвенилото преку стеснување на малите крвни садови во очите. Тие не се препорачливи за долготрајна употреба и всушност нивното користење подолго од неколку дена може и да ги влоши симптомите;
  • Очни антихистаминици: капки кои го намалуваат црвенилото, чешањето и отокот преку блокирање на дејството на хистаминот, главната супстанца која ги предизвикува симптомите на алергија.
  • Очни лубриканти: кај алергискиот конјунктивит обично има недоволно производство на солзи, што всушност ги влошува симптомите. Користењето на капки – вештачки солзи може значително да ги олесни симптомите.
  • Очни стероиди: кога другите медикаменти не помагаат, офталмологот може да препише кортикостероидни капки за да се олеснат симптомите и да се спречи појава на компликации. Но, тие мора да се употребуваат само под надзор на лекар, бидејќи можат да го покачат очниот притисок или пак да доведат до заматување на леќата (катаракта) при подолготрајна употреба.
  • Системски (орални) верзии на гореспоменатите лекови: таблети, кои се даваат во многу тешки случаи, кои не реагираат на локалната терапија со капки.
ТРЕТМАН Црвеното око предизвикано од алергија може целосно да исчезне доколку алергијата се третира со лекови/капки или ако се отстрани алергенот

Како можат да се олеснат симптомите на алергиско црвено око?

  • Ставање ладни компреси врз очите;
  • Користење капки – вештачки солзи;
  • Носење очила за сонце;
  • Избегнување на супстанците кои ги предизвикуваат алергии (доколку е можно);
  • Посета на специјалист за алергии, кој ќе направи соодветни тестови со цел да се откријат супстанците на кои се јавува алергија.

Неколку совети за алергиско црвено око кај децата:

  • Да не ги допираат и тријат очите;
  • Да ги мијат често рацете со сапун и млака вода;
  • Често да се перат постелнината и пешкирите со жешка вода и детергент за да се редуцираат алергените;
  • Да користат наочари наместо контактни леќи за да се намали иритацијата;
  • Убаво да се измијат рацете пред ставање на лекови (капки или масти) во очите;
  • Доколку се пожалат на промени во видот, чувство на страно тело во окото или акутна болка, веднаш да се закаже преглед кај очен лекар.