ПИШУВА:
Д-р Звезда Спасовска
специјалист педијатар
♦♦♦♦♦♦♦
Доењето е еден од најголемите моменти на уживање, задоволство и спокој кај доенчето и секако кај мајката. Допирот на кожата на мајката, нејзиниот мирис и вкусот на мајчиното млеко го најадува и смирува доенчето, давајќи му чувство на сигурност во мајчината прегратка. Од друга страна пак, во текот на доењето мајката се исполнува со позитивни емоции, радост, среќа и задоволство гледајќи едно такво мало суштество да расте пред нејзините очи, безбедно во нејзината прегратка.
Според Светската здравствена организација ексклузивното доење треба да се спроведува до шест месеци. Воведувањето на цврста храна кај доенчето треба да започне од шестиот месец. Доењето секако треба да се одржи до дванаесеттиот месец. Ако има прекин порано мајчиното млеко треба да се замени со адaптирана млечна формула. Доењето може да продолжи до втората година, зависно од желбата и можностите на доенчето и секако на мајката.
Особено е битно да се обрне внимание во процената кога да се прекине доењето кај доенчињета кај кои треба да се воведе цврста храна и да се заменат подоите со истата. Некои доенчиња избираат повеќе да цицаат наместо да внесуваат цврста храна, што може да доведе до пад или застој во телесната тежина и должина, како и развивање на слабокрвност односно анемија во хемограмот
Неопходен е индивидуален пристап кон секоја мајка и нејзиното дете, добра процена и одлука кога ќе се пристапи кон одвикнување, да се одбере соодветното време кога ќе се започне, на кој начин и со кои методи ќе се спроведе за да се олесни процесот и колку долго ќе трае истиот, се со цел детето и мајката заедно најбезболно да го пребродат моментот на прекин на доењето.
Време кога да се прекине доењето
Доењето секако треба да се одржи до дванаесеттиот месец. Може да продолжи до две години зависно од можноста на мајката и однесувањето на детето. Дел од доенчињата и децата после една година се доста напорни во однос на доењето, со често будење за цицање особено во тек на ноќните часови што ја исцрпува мајката, но и тие самите по таква помината ноќ се пораздразливи во текот на денот, поради немирниот сон во тек на ноќта и ненаспаност. Кај некои деца и самите подои траат долго, повеќе од половина час, едноставно сакаат да спијат на града со брадавицата во уста, што доведува до размекнување и разранување на брадавките, пропратено со болка, крвавење и рани кај мајката. Особено е битно да се обрне внимание во процената кога да се прекине доењето кај доенчињета кај кои треба да се воведе цврста храна и да се заменат подоите со истата.
Некои доенчиња избираат повеќе да цицаат наместо да внесуваат цврста храна, што може да доведе до пад или застој во телесната тежина и должина, како и развивање на слабокрвност односно анемија во хемограмот, бидејќи после шестиот месец треба да се внесат и други хранливи материи освен млеко. Кај вакви доенчиња треба да се размисли за прекин на доењето после полнење на една година за да се овозможи внес на сите хранливи материи преку цврстата храна.
Неопходен е ИНДИВИДУАЛЕН ПРИСТАП кон секоја мајка и нејзиното дете, добра процена и одлука кога ќе се пристапи кон одвикнување, да се одбере соодветното време кога ќе се започне, на кој начин и со кои методи ќе се спроведе за да се олесни процесот и колку долго ќе трае истиот
Некои доенчиња и деца после една година едноставно се одвикнуваат, да кажеме лесно, кога ќе ја пробаат цврстата храна им се допаѓа, полека одбиваат да цицаат, и едноставно се откажуваат. Се препорачува мајката, сепак, да биде упорна, да се одржи доењето кај доенчето до наполнување на една година.
Времетраење на процесот на одвикнување
Прекинот на доењето е процес кој треба да трае подолго. Ако се планира прекин на доењето околу дванаесеттиот месец, одвикнувањето треба да започне неколку месеци порано. Намалувањето на подоите треба да биде постепено. Да се започне со укинување на подоите преку ден, и тоа најдобро во утринските часови, кога доенчето е расположено, спремно за игра и пробување на вкусови, со што би му се отргнало вниманието и желбата за доење. Ова постепено одвикнување на доењето го олеснува и намалува лачењето на млеко кај мајката, со избегнување на набрекнатост на градите, болка и развој на мастит.
Ретко, но сепак постојат состојби кои наложуваат итен прекин на доењето, најчесто поради давање на некаква терапија кај мајката која е контраиндицирана во текот на доење, или пак оперативна интервенција кај мајката со анестетици, неодложно отсуство на мајката и сл. Во вакви состојби е неопходна замена на мајчиното млеко со адаптирана млечна формула.
