Откако ќе стигне во семејството, мајките добиваат многу совети во врска со негата и исхраната на бебето. Еден од нив е дека по секој оброк бебето мора да подригне.
- Зошто е важно подригнувањето?
При цицањето или пиењето млеко од шишенце, бебето голта и воздух. Со оглед дека тоа може да предизвика бљуцкање, нервоза и гасови, по7елно е бебето да подригне по оброкот, односно да се ослободи од проголтаниот воздух.
Како расте, бебето се помалку ќе подригнува, но тоа не треба да ве загрижува, тоа е само знак дека научило да не голта воздух при хранењето.
- Дали бебето мора да подригне по оброкот?
Пожелно е бебето во првите месеци по раѓањето да подригне по секој оброк. Меѓутоа, не е страшно ни ако тоа не го направи, ќе подригне кога ќе се разбуди. Ако бебето заспие, а не подригнало, само внимателно ставете го да лежи на страна.
Исто така, ако бебето се разбуди ноќе оти го мачи стомачето, слободно подигнете го да подригне, бидејќи тоа ќе му помогне да се ослободи од грчевите.
- Како да му помогнете на бебето да подригне?
Бебето треба да го земете во прегратка и да го ставите во исправена положба. Можете и нежно да го тапкате по грбот. Во исправена положба, потпрено на вашето тело, бебето треба да остане десет до 15 минути.
Доколку бебето при подригнувањето бљуцне – исфрли малку млеко, не грижете се, тоа така се ослободува од вишокот храна што ја изело. Пожелно е да ставите само пелена на вашето рамо, за да ја заштитите облеката.
