Децата во голема мера влијаат на животите на своите родители. Не само психички, туку и физички, а неодамна објавеното истражување од Финска покажа дека одреден број деца може да влијае и на должината на животот на нивната мајка. Користејќи историски податоци за животниот век на жените во Финска, истражувачите откриле дека жените кои немале деца или имале пет и повеќе деца, старееле побрзо и живееле пократко во споредба со жените кои имале од едно до четири деца.
Студијата објавена во списанието Nature Communications додава нова тежина на претходните теории на еволутивната биологија за врската помеѓу стареењето и репродукцијата. „Нашиот наод е малку изненадувачки, но повторно, логичен“, истакна главната авторка на студијата, Микаела Хуканен од Универзитетот во Хелсинки.
Научниците го објаснуваат ова со фактот дека одредени аспекти на бременоста и воспитувањето на децата го штитат здравјето и го намалуваат ризикот од некои видови рак
Таа објаснува дека во истражувањето биле користени податоци од 14.836 жени, кои вклучувале примероци од крв што покажуваат промени во ДНК поврзани со стареењето, како и податоци за животниот век. Потоа го моделирале влијанието на репродукцијата врз процесот на стареење кај жените во секоја група.
Моделите покажале дека жените со најмногу деца имале тенденција кон пократок животен век. Ова се вклопува во главната теорија на еволутивната биологија позната како „теорија на еднократна сома“, која сугерира дека вложувањето повеќе ресурси во еден аспект од животот (репродукција) оди на штета на други области (како што се репликацијата и поправката на ДНК). Сепак, ги изненадило тоа што и луѓето кои немале деца, исто така старееле побрзо и имале пократок животен век.
Научниците го објаснуваат ова со фактот дека некои аспекти на бременоста и одгледувањето деца го штитат здравјето и го намалуваат ризикот од одредени видови рак. Додаваат дека и зголемената социјална поддршка што ја добиваат некои родители додека децата им се мали, како и грижата што можат да ја добијат од децата подоцна во животот, може да го продолжи нивниот животен век.
Овие придобивки би можеле да бидат дел од причината зошто жените кои немале деца стареат побрзо, но за родителите со повеќе од четири деца, биолошките „трошоци“ можат да ги надминат придобивките, предупредуваат научниците.
За луѓето кои денес одлучуваат дали да имаат деца, разликите во социјалните околности, пристапот до здравствена заштита и висококвалитетните истражувања за репродуктивното здравје би можеле во голема мера да влијаат на тоа како раѓањето или пак немањето деца влијае врз телото и процесот на стареење.
„Сакам да нагласам дека ова не е рецепт за никого за тоа колку деца треба да има“, вели Хуканен. „Ние само ги гледаме поврзаноста и врските.“ Хуканен истакнува дека во студијата се користени историски податоци, а животните околности во меѓувреме во голема мера се промениле.
