Доколку детето често се жали дека е исцрпено или уморно, покрај недостатокот на сон, може да има и недостаток на одреден витамин во организмот. Како што објаснуваат педијатрите, заморот може да биде знак за недостаток на витамин Б12, клучен витамин кој на детето првенствено му е потребен за производство на црвени крвни зрнца и ДНК.
Освен тоа, многу студии покажуваат дека овој витамин е одговорен за одржување на здравјето на нервниот систем. За разлика од другите витамини, Б12 не е присутен во овошјето и зеленчукот бидејќи растенијата не се тие кои го произведуваат. Наместо тоа, детето најчесто може да го внесе преку месо, главно пилешко или мисиркино месо и млечни производи.
Благодарение на тоа што овие намирници се лесно достапни, недостатокот на витамин Б12 не е честа појава. Доколку сепак се појави, децата најчесто се жалат на замор или исцрпеност, а се јавува и бледа кожа на лицето, мускулна слабост, проблеми со концентрацијата или помнењето и дигестивни нарушувања.
