Возењето велосипед е прекрасна физичка активност. Освен што има голем бенефит за физичкото здравје, стручњаците истакнуваат дека е одлично и за менталното здравје. Докажано е дека само 15 минути возење велосипед може значително да го подигне вашето расположение бидејќи при оваа физичка активност, како и со трчањето, се ослободува доволно серотонин за веднаш да ве префрли од “црни мисли“ на “полиња со цвеќиња“.
Но, ако сте бремени, дали за вас е безбедно да возите велосипед?
Според советот на гинекологот Лаки Сехон, возењето велосипед за време на бременоста не мора нужно да претставува ризик, меѓутоа, важно е да се обрне внимание на одредени проблеми и потенцијални ризици.
Со оглед на развојот на бременоста, некои состојби кои доаѓаат со бременоста не треба да се занемарат. Мачнината и вртоглавицата се вообичаени во првото тромесечје, па губењето на рамнотежа и паѓањето од велосипедот е еден од ризиците.
“Важно е да бидете внимателни и да го слушате вашето тело, а ако чувствувате вртоглавица, што и да правите – престанете. Ако планирате да возите велосипед, за да избегнете вртоглавица и гадење, останете хидрирани и никогаш не возете гладни“, вели д-р Сехон.
За да избегнете грчеви во мускулите, кои исто така се јавуваат во бременоста во првите 3 месеци, намалете го интензитетот или престанете да возите доколку почнете да чувствувате напрегање.
Со оглед дека третото тромесечје е приказна за себе поради општата состојба на трудницата и големината на стомакот, возењето велосипед станува многу ризична активност. Големината на стомакот влијае на рамнотежата и го зголемува ризикот од падови и повреди. Исто така, на трудниците може да им биде непријатно да возат велосипед, особено ако треба да се наведнат кон рачката додека возат.
“Важно е ризикот од падови да се сведе на најмало можно ниво, особено во доцното второ и трето тромесечје, бидејќи ударите во стомакот може да ја оштетат постелката и да предизвикаат опасно крварење“, предупредува гинекологот.
Затоа, иако лесното возење велосипед изгледа како добра физичка активност, имајте на ум дека вашето тело не е исто, дури и вашата координација на движењата е променета, а положбата на велосипедот не е воопшто удобна за трудниците.
