Според резултатите од истражувањето спроведено во Германија, настинките и другите инфекции кои се јавуваат во првите шест месеци од животот на детето може да го зголемат ризикот од развој на дијабетес тип 1 за речиси 20 проценти. Инаку, научниците веќе подолго време се сомневаат дека вирусните инфекции можат да предизвикаат дијабетес тип 1.
Децата кои имале респираторна инфекција во текот на првите шест месеци од животот имале 17 отсто поголем ризик да развијат дијабетес тип 1 подоцна во животот, додека тој ризик кај децата кои имале вирусна инфекција бил за 19 отсто поголем.
Се смета дека вирусите на одреден начин доведуваат до нарушување на работата на имунолошкиот систем. Инаку, основна карактеристика на дијабетес тип 1 е целосен недостаток на инсулин, кој кај децата и адолесцентите обично е условен од автоимуно уништување на бета-клетките на панкреасот.
Исто така, треба да се каже дека оваа студија ја поддржува теоријата дека одредени здравствени компликации во првите години од животот се клучни за развојот на имуниот систем на детето. Имајќи предвид дека патогенезата на дијабетес тип 1 сè уште не е целосно разјаснета, невозможно е да се спроведат превентивни мерки.
Извор: JAMA
