За време на бременоста, идните мајки се загрижени за различни прашања поврзани за сопственото здравје кои истовремено можат да влијаат на здравјето на нивните бебиња, а едно од често поставуваните прашања е дали удар или повреда на стомакот може да му наштети на детето.
Многу фактори во текот на бременоста го прават стомакот склон кон удари, како лабави лигаменти и зглобови, се поголемиот обем и чувството на блага растресеност. Меѓутоа, стручњаците сметаат дека нема потреба за загриженост секој пат кога ќе се удрите во стомак, дури ни пад нанапред или удар веројатно нема да му наштетат на вашето бебе.
Според магазинот Parents, мајката природа обезбедува безбедна и заштитена околина за фетусот, кој лебди во амнионската течност во амнионската кеса, која ја штитат мускулите на матката и стомакот, појаснува д-р Овен Монтгомери од Универзитетот за здравствени науки Алегени. ‘Рбетот одзади и градниот кош однапред, исто така прават коскена бариера.
Лесен притисок на стомакот додека расте е во ред, но цврсти удари, како удари со нога, може да бидат опасни, особено ако се доближувате кон крајот на бременоста.
Помош од лекар треба да побарате доколку почувствувате дека вашето бебе не е активно како претходно (движење околу пет пати во период од два часа додека лежите е нормално ако сте во второ или трето тромесечје) или ако крварите, почувствувате контракции или грчеви во период од 12 часа од инцидентот.
Траума на матката во било каква форма (силен удар, пад директно на стомак, сообраќајна несреќа) може да предизвика нешто кое се нарекува одвојување на постелката.
Ова е состојба во која постелката се одделува од ѕидовите на матката. Во поблаги случаи, може да дојде до вагинално крварење и / или контракции без последици за бебето. Но, во потежок случај, голем дел од постелката се одделува и може да предизвика проблеми за бебето.
Преземете дополнителни мерки на претпазливост за да бидете сигурни дека нема да се лизнете. Внимавајте на мраз, снег и влажни лисја и свежо избришани подови. Препорачливо е да носите рамни чевли и да бидете внимателни при влегување и излегување од када или туш и користите ограда на скали.
