Денеска дете кое не посетува никаква организирана вонучилишна активност е ретка појава. А дури и ако има само една – се смета за недоволна. Покрај една задолжителна спортска активност (која веќе нема интензитет два пати, туку четири до пет пати неделно), децата денеска задолжително посетуваат и јазични курсеви, музичко училиште, што го прави распоредот на слободните активности еднаков на училишниот. А кога на тоа ќе се додаде и пишувањето домашни задачи и учењето, тешко е да се најде место за одење на училишно игралиште.
Образованието е најважно?
Пред се, зад секое такво дете стојат неговите родители. Веќе во градинка го вклучуваат во бројни активности, честопати лишувајќи му време за игра, совладување вештини како возење велосипед, импровизација, испитување на светот околу себе… Поинформирани од претходните генерации, свесни за придобивките од образованието и активното занимавање со спорт и поучени од сопственото искуство колку е важно да има цел ден, денешните татковци и мајки ги ангажираат своите малечки во што поголем број на активности. Спортувањето е апсолутно пожелно, но ако ја комбинираме таквата активност, која се одвива неколку пати неделно, со, на пример, музичко училиште, кое има исто темпо на одржување, тогаш со право се поставува прашањето – нели е тоа малку премногу?!
Управувате со неговото време како ваше?
На ова прашање родителите често одговараат дека не претеруваат, бидејќи нивните деца успеваат сето тоа да го направат. И притоа имаат слободно време. Но, ова е често гледање на ситуацијата од еден исклучиво, личен агол. Децата генерално размислуваат поинаку и сепак би сакале да имаат повеќе време за себе. Родителите често се плашат дека децата не го користат добро слободното време кога немаат обврски, па се трудат да си го исполнат денот со позначајни обврски и активности. А притоа забораваат дека е добро нивното дете да има дел од денот што може да го планира и да го помине со другарите како што сака.
Без разлика дали е пред телевизор или во соба, на компјутер. Едноставно треба да му дадете дел од времето што тоа ќе го планира според својата волја, бидејќи ако постојано го контролирате и организирате секој час од неговото време, тоа ќе се чувствува под притисок и ограничување. Секогаш треба да ги земете предвид желбите на вашето дете и да му дадете простор во оваа смисла.
Притоа, добро е да се размисли дали навистина му се потребни сите овие активности и дали треба да се ослободи од некои од нив? И дали некои од активностите што ги посетува не се дел од некои ваши нереализирани приказни од детството што сакате вашето дете да ги реализира?
