Во секое семејство постои тој еден родител кој знае како да го претвори здодевното попладне во мини-авантура. Оној кој секогаш има сила да игра, ги знае сите правила на друштвените игри и не бега од глупирање. Ви звучи познато?
Ако ова звучи како вашиот партнер или можеби се препознавате себеси во оваа улога, веројатно знаете дека да се биде „забавен родител“ е и убаво и предизвикувачко. Бидејќи, иако смеата, игрите и релаксацијата звучат идеално, оваа улога носи со себе повеќе од само забава.
Што всушност значи да се биде „забавен родител“?
Забавен родител е оној кој знае како да се спушти на нивото на детето, буквално и фигуративно. Тој игра, се глупира, фантазира и знае како да го претвори моментот во игра. Но, како што објаснуваат психолозите, ова не значи дека овој родител ги занемарува правилата, туку едноставно почесто избира смеа и флексибилност.
Психологот д-р Тамар З. Кахајни вели дека забавните родители се спонтани, опуштени и подготвени да им покажат на децата дека дури и возрасните не се совршени. Психијатарот д-р Шам Сингх додава дека често овие родители се пофлексибилни во врска со правилата, сè со цел да создадат простор за поврзување со децата преку забава.
Како да препознаете забавен родител?
Можеби (не)свесно вие сте таа личност ако:
- Често се вклучувате во имагинативна игра без премногу размислување
- Не се стресирате за секоја минута од распоредот
- Планирате патувања „само за децата да се забавуваат“
- Знаете дека понекогаш мора да ги оставите правилата и да уживате во моментот
И да, честопати татковците се перцепирани како забавни родители, додека мајките се повеќе задолжени за распоредот, ручеците и стоматолозите. Но, тоа не е секогаш случај, многу мајки (и татковци) ги балансираат сите улоги одеднаш. Особено ако се самохрани родители.
Забавата и игрите носат огромна емоционална придобивка. Децата полесно се опуштаат, се поврзуваат, ја развиваат својата имагинација и се чувствуваат побезбедно со родител со кого можат да бидат целосно свои. Покрај тоа, забавата влијае и на родителот, помага во намалувањето на стресот и ја враќа таа доза на детска радост што често ја забораваме.
