Во зимските месеци почесто се јавуваат настинка, грип, КОВИД-19 и респираторен синцицијален вирус (RSV). Причината е што вирусите полесно се пренесуваат на ниски температури, а луѓето во овој период поголем дел од времето го минуваат во затворени простории.
Поради преклопување на симптомите, често е тешко со сигурност да се утврди за која болест станува збор. Покачена телесна температура, болка во грлото, чувство на замор или исцрпеност, главоболка, дијареја, мачнина или повраќање, како и губење на апетит, се симптоми што можат да се јават и кај КОВИД-19 и кај грип.
Двете болести можат да предизвикаат кашлица, но токму во нејзините карактеристики може да се забележи разликата. Кај грипот често се јавува сува кашлица која може да се појави многу нагло. Од друга страна, кај КОВИД-19 најчесто станува збор за нова, постојана кашлица, што подразбира често кашлање подолго од еден час или три или повеќе епизоди на кашлица во период од 24 часа.
Ова објаснување го потврдува и д-р Рупа Пармар, семеен лекар и медицинска директорка во установата Midland Health, која претходно за The Mirror изјави дека кај настинката кашлицата обично е блага, додека кај грипот е сува. Според неа, кај КОВИД-19 кашлицата е сува и континуирана, а многу заболени кашлаат подолго од еден час или имаат повеќе напади на кашлица во текот на денот.
Двете болести можат да предизвикаат кашлица, но токму во нејзините карактеристики може да се забележи разликата
Разликите меѓу КОВИД-19 и грипот не се сведуваат само на кашлицата. Губење или промена на сетилото за мирис и вкус често се пријавуваат кај КОВИД-19, додека кај грипот се значително поретки. Исто така, отежнатото дишење се наведува како симптом на КОВИД-19, но не и на грип, иако може да се појави кај тешки форми на грип.
Доколку се појават симптоми на КОВИД-19 или грип, се препорачува да останете дома и да избегнувате контакт со други луѓе доколку лицето или детето имаат покачена температура или не се чувствуваат доволно добро за одење на работа, училиште, градинка или за извршување на секојдневните активности. Враќањето на вообичаените обврски се препорачува дури откако состојбата ќе се подобри и кога нема покачена телесна температура.
Се советува контакт со лекар доколку постои загриженост во врска со симптомите на КОВИД-19 или ако не е јасно како да се постапи, ако симптомите се влошуваат или не поминуваат, ако се појават дополнителни знаци на болест како осип, губење на апетит или општа слабост, ако високата температура трае пет дена или подолго или не се намалува со парацетамол, ако бебе помладо од три месеци има температура од 38 °C или повисока, ако дете на возраст од три до шест месеци има температура од 39 °C или повисока, како и ако лицето или детето имаат симптоми на грип и припаѓаат на ризична група, како што се лица постари од 65 години, бремени жени, лица со хронични заболувања или ослабен имунитет, или ако симптомите не се подобрат по седум дена.
