Мајките кои ги дојат своите бебиња, голем дел од времето го посветуваат во анализа на самиот процес. Пресметуваат колку количински и колку често бебето јаде. И секоја мајка забележува кога бебето јаде поретко или помалку од вообичаено.
Кога ќе се случат промени во доењето на бебето, важно е да сфатите зошто се случиле и како да ги поправите, односно како да се вратите на старо.
Како да препознаете штрајк на доењето?
Штрајкот на доење е дефиниран како период во кој бебето кое уредно било доено изненадно го одбива тоа. Таквото однесување обично се случува откако бебето ќе наполни три месеци и ќе стане свесно за светот околу себе.
Бебињата кои стапуваат во штрајк обично одбиваат дојка, но истовремено изгледаат несреќно и вознемирено оти не цицаат. Секако, тоа што бебето понекогаш се отргнува од градата или се повлекува, не значи веднаш дека е во штрајк. Можеби само нешто го попречува. Одбивањето на доење кое станува правило е знак дека бебето штрајкува.
Понекогаш родителите штрајкот погрешно го сфаќаат како знак дека бебето е подготвено да се одвикне од доење. Тоа е малку веројатно, оти бебињата ретко сами се одвикнуваат од доење пред втората година, а и кога ќе го направат тоа, обично се работи за постапно намалување на траењето и зачестеноста на доењето, а не за нагло престанување.
Зошто доаѓа до штрајк на доењето?
Бебињата, влегуваат во ваков штрајк од различни причини кои може да бидат и физички и емоционални. Некои од причините се:
- Запушување или болка во увото поради која доењето е непријатно
- Воспалено грло или раничка во уста поради кои доењето е непријатно
- Било каква болест што влијае на устат на бебето и го прави доењето непријатно
- Заби и болка во непцата
- Фрустрација предизвикана од преслаб проток на млеко или прекумерна количина млеко
- Шок по ситуација во која биле затечени, како звукот на мајката по гризнување
- Чувствување на стрес кај мајката, лутина или било која друга состојба поради која таа не е фокусирана на доењето
- Пречки предизвикани од претерано стимулативна околина
Што да направите ако дојде до штрајк на доење?
Иако штрајкот за доење може да биде стресен и за вас и за вашето бебе, постојат многу тактики што можете да ги користите за да му помогнете на вашето бебе успешно да се врати на доењето. Постојат два главни предизвици за кои треба да се грижите во ова време: одржување на снабдувањето со млеко и обезбедување храна за вашето бебе.
Имено, кога бебето јаде помалку млеко од вообичаеното, мора да се измолзувате за да го зачувате производството на млеко. Со измолзувањето ќе му сигнализирате на телото дека сè уште ви треба млеко, така што телото ќе продолжи да го произведува.
Кога станува збор за решавање на проблеми, постојат неколку начини на кои можете да го охрабрите вашето бебе да дои:
- Легнете со бебето така да кожата ви се допира и нежно понудете го за подој
- Променете ја положбата
- Дојте во затемнета просторија за да спречите одвлекување на вниманието
- Обидете се да останете опуштени и работете на ослободување од стресот поради доењето
- За време на доењето, направете сè за тоа да биде позитивно време и за вас и за вашето бебе.
Повеќето штрајкови со доење траат од неколку дена до една недела. Ако вашето бебе одбива да јаде без оглед на начините на кои се обидувате да го нахраните, губи на тежина, не уринира или нема столица како вообичаено, или ако покажува било какви други знаци кои ве загрижуваат, веднаш контактирајте со педијатар.
