Секое семејство има свои вредности кои ги пренесува на децата – преку начинот на кој разговараме, раскажуваме приказни и се однесуваме кон другите. Децата секогаш учат набљудувајќи го однесувањето на своите родители, нивните реакции и меѓусебните односи, па затоа е важно возрасните да бидат свесни какви пораки испраќаат со тоа.
Родителите кои знаат што им е важно и тоа доследно го покажуваат преку секојдневните постапки, најмногу влијаат врз успехот на своите деца, вели терапевтот и советник Дејвид МекФаден. Тој издвојува десет животни лекции кои најуспешните деца ги учат од своите родители.
- Работна етика
Децата кои успеваат, уште од мали нозе учат работни навики – учествуваат во домашни обврски, се грижат за своите задачи и ја разбираат важноста на трудот.
„На тој начин развиваат чувство на одговорност и тимска работа, што подоцна станува темел на успехот,“ објаснува терапевтот.
- Грижа едни за други
„Успешните деца растат со свеста дека семејството е важно и дека членовите треба да се штитат и помагаат меѓусебно. Емпатијата и грижата за другите поттикнуваат чувство на поврзаност и сигурност што ја обликува нивната емоционална стабилност,“ вели МекФаден.
- Почит
Да се научи почит значи да се ценат другите луѓе и да се прифаќаат различностите.
Децата кои знаат да покажат почит полесно ги разбираат туѓите потреби, подобро комуницираат и градат поздрави односи, тврди терапевтот.
- Искреност
„Кога родителите ја поттикнуваат искреноста и самите ја живеат, децата учат колку е вистината важна во секојдневниот живот. Искреноста гради доверба, а довербата ги зацврстува сите односи – и во семејството и надвор од него,“ истакнува МекФаден.
- Одговорност
Одговорноста им помага на децата да развијат самодоверба, упорност и чувство дека имаат контрола над сопствениот живот. Кога знаат дека нивното однесување има последици, учат да носат подобри одлуки и да ги прифаќаат последиците од нив.
- Традиција
Семејните традиции им даваат на децата чувство на припадност и континуитет.
Терапевтот нагласува: „Без разлика дали станува збор за празници, семејни собири или посебни ритуали, тие спомени ја зајакнуваат нивната поврзаност и идентитет.“
- Дарежливост
Децата кои учат да им помагаат на другите стануваат посоочувствителни и посвесни за заедницата. Делењето и помагањето создаваат чувство на цел и благодарност.
- Љубопитност
„Успешните деца никогаш не престануваат да учат и да поставуваат прашања. Родителите кои ја поттикнуваат љубопитноста им отвораат простор на децата да истражуваат, размислуваат и самостојно да го откриваат светот,“ вели МекФаден.
- Простување
Децата кои учат да простуваат полесно се справуваат со разочарувања и конфликти.
Простувањето им помага емоционално да растат, да станат поотпорни и да научат да поставуваат здрави граници.
- Ефикасна комуникација
„Комуникацијата е темел на секој успешен однос. Децата кои учат јасно да ги изразуваат своите мисли и потреби полесно решаваат проблеми, градат самодоверба и постигнуваат успех во животот,“ заклучува терапевтот.
