Додека некои бебиња уште од првите денови од животот спијат убаво, некои родители се соочуваат со бројни неволји по тоа прашање – на пример, бебето спие само во раце и се буди веднаш штом ќе го спуштат. Кога станува збор за малку поголеми деца, на возраст од градинка, и тука понекогаш има проблеми со спиењето, па се случува малите на две-три години да се разбудат неколку пати во текот на ноќта.
Кои се најчестите проблеми со спиењето кај децата и предлози како да ги решите.
- Детето спие само во раце
Ако морате да го држите детето во раце додека спие бидејќи во спротивно веднаш се буди, не сте единствените. Експертите советуваат во овој случај да не го карате детето, туку само почесто да го гушкате.
„На бебето му треба контакт пред сè и најмногу со мајка“, вели педијатриската медицинска сестра и детски советник Клементин Теста. “Ова ќе му помогне на мозокот да произведе окситоцин, хормонот за приврзаност, кој ќе му помогне на бебето да се смири. Галете го детето пред спиење, кажете му дека го сакате. Кога на овој начин ќе ја задоволите неговата потреба за контакт, ќе биде полесно да заспие И не грижете се, тоа нема да го разгали, ниту да направи да не може да заспие само кога ќе порасне“, додава таа.
- Бебето често плаче во сон
Ако детето не е гладно, нема никакви болки, не му се оди во тоалет, тогаш обрнете внимание на другите потенцијални причини за лошо спиење. Можеби има премногу светлина во просторијата, што го попречува производството на мелатонин. Друга можна причина е тоа што на детето му е премногу жешко, што можете да го проверите со допирање на задниот дел од главата – ако се поти, облечете полесни пижами или разладете ја просторијата пред спиење.
- Детето постојано се буди ноќе
Сосема е нормално бебето да се буди ноќе затоа што му треба храна, пресоблекување и слично, но навистина станува премногу за родителите ако детето, да речеме, на тригодишна возраст, и понатаму се буди ноќе.
Експертите велат дека причината за тоа е недостатокот на комуникација со родителите, па за да го избегнете тоа, обидете се да му посветите повеќе внимание на детето во текот на денот и да разговарате со него.
„Детето доаѓа дома од градинка, родителите од работа, почнува подготовка на ручек/вечера, телефонски повици, домашни обврски… Наместо тоа, одвојте барем 20 минути кои ќе ги поминете посветени исклучиво на детето, играјќи, гушкајќи, разговарајќи со него“, советува Теста.
- Детето смислува „сто работи“ за да остане будно
Му се пие вода, му се оди во тоалет, уште е гладно, сака уште една прегратка, па сака пак да оди во тоалет? Експертите советуваат што поскоро да ги прекинете овие идеи и да воспоставите јасна вечерна рутина. Пред спиење, дајте му на детето да се напие вода, оставете го да оди во тоалет, бакнете го за добра ноќ и изгаснете го светлото.
„Уште една важна работа е смирувачката рутина пред спиење. После тоа ќе спие помирно и нема да ве вика на секои пет минути да пие вода, да оди во тоалет…“, тврди педијатриската сестра.
- Сака да спие во кревет со вас
Ако приказната се повторува секоја вечер – детето одбива воопшто да легне во својот кревет или задолжително преминува кај вас среде ноќ, единствено што ви преостанува е да бидете упорни.
„Секогаш кога детето ќе дојде во вашиот кревет, смирено вратете го во неговиот кревет и јасно кажете: „Не, ова е наш кревет, ти спиеш во својот“, советува Клементин.
Исто така, нејзин совет е да не му дозволувате на вашето дете да спие во вашиот кревет ниту преку ден, за да се навикне да спие во својот.
