„Образовниот процес е од неспорно значење, но не смееме да го занемариме здравствениот аспект и можноста за трансмисија на вирусот во училиштата. Неколку пати укажавме дека сé може да се надомести, но не и здравјето. Гледано од тој аспект, имајќи ги во предвид и искуствата од некои други земји, нашата препорака, од Комисијата за заразни болести, е училиштата да почнат со работа онлајн, со два исклучока: еден за децата од прво до трето одделение, и ова имајќи во превид дека нашата анализа покажа дека кај најмалите инциденцата (стапката на заболување) е најмала, некаде околу 3,4%, а тие имаат сосем лесна форма на болеста или се практично асимптоматски носители. Сепак, по барање на родителот децата од прво до трето одделение ќе можат да ја следат целосно наставата и онлајн“, министерот Филипче на вчерашната прес конференција.
Наставникот треба да биде цело време присутен со децата, да не се излегува за време на одморите, а почетокот на различни одделенија да биде со 10 минути разлика, за да не се сретнуваат многу деца на влезовите или при излезот на крајот на наставата
Тој додаде дека по разговорите и интензивната комуникација со родителите и другите стручни лица решиле да дозволат да има избор од родителот. „Причина е тоа што во одредени семејства има родители кои се хронично болни, во висок здравствен ризик, децата се чуваат дома од повозрасни членови, баби и дедовци, кои исто така може да имаат некаква хронична болест и на тој начин семејството би било во поголем ризик. Вториот исклучок е на барање на основачите или на општините. Таму каде што во школите или регионалните училишта има мал број деца во класовите или мал број класови во училиштата, согласно епидемиолошката состојба да добијат дозвола наставата да ја организираат со физичко присуство“, вели министерот Филипче.
Изготвени протоколи кои се целосно усогласени и искоординирани со МОН
Образовниот процес е важен, но не смее да се занемари здравствениот аспект и можноста за трансмисија на вирусот во училиштата – со таа цел се изготвени протоколи кои се целосно усогласени и искоординирани со Министерството за образование и наука, информираат од МЗ.
„Во училниците не треба да има повеќе од 20 деца, тие треба да седат на еден ипол метар дистанца, да носат маска, наставникот да биде цело време присутен со нив, да не се излегува за време на одморите, а почетокот на различни одделенија да биде со 10 минути разлика, за да не се сретнуваат многу деца на влезовите или при излезот на крајот на наставата. Наставниот кадар, училиштата, сите се целосно информирани за протоколите, имавме бројни состаноци и доколку овие протоколи добро се применуваат, ризикот од ширење на заразата е минимален“, потенцира министерот Филипче.
