Родителите на најдобар можен начин се трудат да ги воспитаат своите деца, но се чини дека понекогаш забораваат дека децата апсорбираат многу повеќе од однесувањето на мама и тато отколку од нивните зборови. Објаснето со едноставен пример, бадијала е да им кажуваме на децата да не јадат премногу слатки, ако ние пред нив се „давиме“ во чоколадо.
Децата копираат дури и некои од навиките на родителите, дури и оние за кои мајките и татковците не се ни свесни. Во продолжение прочитајте кои седум однесувања децата ги преземаат од родителите.
- Управување со емоциите
Децата забележуваат сè, а емотивните реакции на родителите се модел на кој се угледуваат децата. Ако мама и тато некоја тешка ситуација ја поднесат смирено и со голема самоконтрола, поголеми се шансите и детето да управува со своите емоции на ист начин. Од друга страна, ако постојано е сведок на некои тензии во домот, и детето тоа однесување ќе го повторува во слични ситуации.
- Однос кон храната
Родителите често не се свесни за влијанието што го имаат врз навиките во исхрана на нивните потомци. Децата брзо ги прифаќаат секојдневните навики, од тоа дали мама и тато го прескокнуваат појадокот, до тоа дали често јадат брза храна или избираат здрава храна. Многу често го развиваат истиот однос кон храната каков што имаат нивните родители, без разлика дали се работи за здрав однос кон храната или не.
- Комуникација со другите
Начинот на кој мама и тато комуницираат меѓу себе и со другите директно влијае на однесувањето на нивните деца. Ако користат позитивни фрази и се однесуваат со другите со почит, детето ќе научи да биде внимателно и љубезно да комуницира со другите. Спротивно на тоа, ако има негативни примери, кога родителите постојано се прекинуваат еден со друг или други луѓе додека зборуваат, покажуваат непочитување, викаат, тоа станува образец на неговото однесување.
- Секојдневни навики
Секојдневните навики, како што се одржување на лична хигиена, чистење на домот и работните навики, се исто така дел од родителското однесување кое децата го усвојуваат. Ако мама и тато се посветени на своите обврски и се темелни, и децата ќе научат да бидат организирани и дисциплинирани. Секојдневните навики влијаат на градењето на карактерот и им помагаат на децата да водат поструктуриран, стабилен живот.
- Соочување со предизвици
Децата учат како да се справат со предизвиците и стресот од однесувањето на нивните родители. Родителот кој има позитивен став дека за се може да се најде решение, ова верување им го пренесува на децата. Од друга страна, ако се откаже од својата цел поради првата пречка, го фаќа паника, и неговите наследници ќе тргнат по тој пат.
- Вредности и морал
Децата учат што е добро, а што не од однесувањето на нивните родители. Ако мама и тато демонстрираат искреност, одговорност и добрина преку своето однесување, тие многу природно ги пренесуваат овие вредности на своите наследници. Спротивно на тоа, ако детето биде сведок на лаги, манипулации или нечесност, веројатно ќе го прифати таквото однесување.
- Однос кон технологијата
Начинот на кој родителите ги користат уредите и технологијата е друга работа што децата ја имитираат. Ако мама и тато поминуваат премногу време на своите телефони, децата може да добијат погрешна порака дека технологијата е приоритет. Од друга страна, доколку има правила во семејството и разумно се користи технологијата, а времето се посветува и на други активности, децата ќе имаат поздрав однос кон користењето на уредите.
Имајте на ум дека децата се огледало на нивните родители и дека не е важно само она што ќе им го кажете, туку и она што тие го гледаат од вас. Вашите секојдневни навики можат да имаат големо влијание врз развојот на вашите деца, дури и кога станува збор за некои несвесни постапки и навики, затоа потрудете се секогаш да им бидете добар пример во се.
