Ново истражување спроведено на англискиот Универзитет Астон покажа дека децата на возраст од само четири години внесуваат дури 79% повеќе калории кога им е досадно, во споредба со периодите кога се вклучени во активности или имаат интереси. Во просек, истражувањето покажува дека децата кои чувствувале досада изеле 95 kcal повеќе откако веќе биле сити, додека оние во неутрална емоционална состојба изеле само 59 kcal повеќе.
Научниците тврдат дека прехранбените навики кај децата се обликувани од генетика, темперамент, и низа други фактори – вклучително и начинот на кој возрасните ги хранат. Во претходни истражувања, авторите анализирале однесувања поради кои децата почесто јадат кога доживуваат негативни емоции, како досада или тага. Утврдено е дека значајна улога играат возрасните кои им нудат храна како начин на смирување.
Сепак, изгледа дека ова однесување – познато како емоцонално хранење – ја зголемува веројатноста децата да јадат повеќе и понатаму, секогаш кога ќе бидат вознемирени. Родителите, често несвесно, ги учат децата да бараат храна кога се во лошо расположение.
Како изгледала студијата?
Како дел од истражувањето, научниците ги прашале родителите за нивната практика на хранење и за темпераментот на нивното дете. Децата и родителите добиле стандарден оброк кој го јаделе до ситост. Потоа, децата учествувале во низа секојдневни услови за да се процени нивното расположение – меѓу кои и состојба на досада.
Истражувачите откриле дека ако родителите изјавиле дека често користат храна за да ги смират емоциите на детето, и ако детето било многу емотивно, тогаш тоа дете јадело пет пати повеќе калории кога му било досадно (104 kcal) во споредба со состојба на неутрално расположение (21 kcal).
Зошто ова е важно?
„Ако децата внесат толку повеќе калории за само четири минути лабораториски предизвикана досада, а имајќи предвид дека досадата е честа емоција кај децата, тогаш потенцијалот за прекумерен внес на калории во текот на денот, неделата или годината е навистина голем – особено ако храната им е секогаш достапна“, велат истражувачите.
Совети за родителите
Истражувачите нагласуваат дека родителите не треба да се плашат од детската досада, туку напротив – децата треба да научат да ја доживуваат досадата без да посегнуваат по храна.
Родителите можат:
- да ја пренасочат вниманието на детето кога му е здодевно,
- или да ја намалат достапноста на храната во тие моменти, со што се намалува веројатноста децата да бараат храна од досада.
Иако постојат индивидуални разлики меѓу децата, ова истражување покажува дека начинот на кој родителите користат храна како средство за смирување има директно влијание врз тоа дали детето ќе развие навика да јаде емоционално.
Иако може да делува практично и утешно, користењето храна како утеха може да доведе до проблеми со исхраната и емоционалното регулирање во иднина. Затоа е важно родителите и негувателите да бидат свесни дека ова краткорочно решение може да остави долгорочни последици.
