Колку пати ви се случило да се вратите од работа уморни, а вашето дете едвај ве дочекало и е подготвено да игра? Ако го одбиете, веројатно ќе се чувствувате лошо, но понекогаш едноставно немате идеи или волја за играње. Во такви ситуации добро е да посегнете по неколку мудри игри во кои децата секако ќе уживаат, а вас нема целосно да ве исцрпат.
Фризерски салон
Сетете се на вашето детство и на сите фризури што сте ги направиле на мајките, татковците, бабите или куклите. Подгответе му на детето ластичиња, чешли, марами и шноли и дозволете му да си игра со вашата коса. Нека ве чешла, испробува различни фризури и нека се забавува додека вие седите на троседот.
Студио за масажа
Покрај фризерскиот салон, вашето дете може да си игра студио за масажа. Нека седне пред вас и направете му нежна масажа на грбот, можете да користите и нежно масло за тело, а потоа оставете го детето вас да ве измасира. Наместо грбот, можете да си ги масирате и рацете или стапалата. Тоа ќе биде игра во која ќе уживате и двајцата.
Цртање по грбот
Легнете на подот и одморајте, а детето нека ви црта со прстите по грбот. Обидете се да погодите што нацртало или дајте му предлози што да нацрта. Оваа игра ќе биде пријатна, а во неа можете да го вежбате детското знаење за различни поими, па дури и букви.
Амбуланта
Соберете ги играчките на детето, извадете газа и фластери или медицински прибор за игра и отворете мала амбуланта во дневната соба. Детето може да ве завитка во газа, да ви лепи фластери, да ви ги прегледа ушите и грлото, да ве стави на кревет, да ви ја измери температурата, а сето тоа може да го направи и со своите играчки.
