Децата кои се на веганска и вегетаријанска исхрана се послаби и пониски од децата што консумираат месо, покажува најголемата студија од ваков вид. Истражувачи од САД, Италија и Австралија анализирале претходни студии што опфаќаат повеќе од 40.000 деца со различни начини на исхрана.
Според наодите, децата на веганска исхрана биле во просек до 4 см пониски од децата што јадат и растителна и животинска храна. Младите вегани и вегетаријанци имале и понизок индекс на телесна маса (БМИ) – мерка за тоа колку телесни масти има човек во однос на висината. Колку е понизок БМИ, толку лицето е поблиску до категоријата потхранетост.
Растителната исхрана може да нема доволно од некои клучни хранливи материи како што се калциум, железо, витамин Б12, јод и селен, а децата имаат зголемени нутритивни потреби во периодите на брз раст и развој.
Научниците велат дека исхраната без месо е добра за планетата и можа да биде здрава, но само доколку се користат соодветни додатоци во исхраната.
„Добро испланираните вегетаријански и вегански диети се нутритивно соодветни и корисни за возрасни“, изјави авторот на студијата, д-р Волфганг Маркс од Универзитетот Дикин во Австралија. „Но, има многу помалку јасност околу нивната соодветност за деца – што доведува до неусогласени, па дури и спротивставени совети за родителите.“
„Нашите наоди укажуваат дека е неопходен балансиран пристап, при што семејствата треба внимателно да внимаваат на одредени хранливи материи – особено витамин Б12, калциум, јод, железо и цинк – за да се обезбеди децата да добијат сè што им е потребно за да напредуваат“, додаваат тие.
Растителната исхрана може да нема доволно од некои клучни хранливи материи како што се калциум, железо, витамин Б12, јод и селен, а децата имаат зголемени нутритивни потреби во периодите на брз раст и развој
За студијата, истражувачите ги анализирале податоците од 59 студии во 18 земји, кои опфаќаат 48.000 деца и адолесценти. Споредбата вклучувала 7.280 вегетаријанци, 1.289 вегани и 40.059 лица што јадат и растителна и животинска храна.
„Вклучените студии опфатија деца и адолесценти, на возраст од доенчиња до доцна адолесценција, во зависност од конкретната студија“, изјави авторката на студијата, Моника Дину, професорка по биологија на Универзитетот во Фиренца.
Според резултатите, вегетаријанците биле во просек 0,69 кг полесни и 1,19 см пониски од оние кои јаделе сè, додека веганите биле 1,17 кг полесни и 3,64 см пониски од нив. Во споредба со оние кои јадат сè, вегетаријанците имале и пониска маса на масти, помала минерална содржина на коските и понизок БМИ, додека веганите имале понизок раст и понизок БМИ.
„Двете групи имаа значително понизок БМИ, што одразува послаб профил на раст, во согласност со претходни наоди“, наведува тимот.
Студијата ги анализирала и внесените хранливи материи во споредба со другите типови исхрана. Децата вегетаријанци внесувале повеќе влакна, железо, фолати, витамин Ц и магнезиум од оние кои јаделе сè, но имале понизок внес на протеини, масти, витамин Б12 и цинк.
„Кај веганите се забележани слични обрасци, со особено низок внес на калциум“, наведуваат научниците.
И покрај овие наоди, вегетаријанската и веганската исхрана имале и одредени предности во однос на исхраната со месо. Децата вегани и вегетаријанци имале подобро кардиоваскуларно здравје од оние кои јаделе сè, со пониски нивоа на вкупен холестерол и LDL-холестерол – таканаречениот „лош“ холестерол.
Општо земено, истражувачите ги повикуваат родителите да бидат информирани, да ги истражат достапните додатоци и да побараат поддршка од здравствени професионалци.
Веганската и вегетаријанската исхрана може да поддржи здрав раст кај децата и да понуди одредени здравствени придобивки, како подобро здравје на срцето. Сепак, овој начин на исхрана носи ризик од дефицити доколку клучните нутриенти, како витамин Б12 и цинк, не се внесуваат преку додатоци. „Нашата анализа на постојните докази сугерира дека добро испланираните и соодветно суплементирани вегетаријански и вегански диети можат да ги задоволат нутритивните потреби и да поддржат здрав раст кај децата“, изјави професорката Дину.
Во изминатата деценија, популарноста на вегетаријанските начини на исхрана се зголеми поради „етички, еколошки и здравствени мотиви“, наведува истражувачкиот тим. „Сепак, тие носат и специфични нутритивни предизвици кои бараат внимателно планирање на исхраната и континуирано клиничко следење“, наведуваат тие во својот труд, објавен во списанието Critical Reviews in Food Science and Nutrition.
Британската Национална здравствена служба (NHS) наведува дека црвеното месо е добар извор на протеини, витамини и минерали и може да биде дел од балансирана исхрана, но прекумерната консумација го зголемува ризикот од рак на дебелото црево. Консумирањето црвено месо веќе е поврзано и со срцеви заболувања – водечка причина за смртност во светот, како и со рак на ректумот, пишува Дејли мејл.
