Првите знаци на зголемена склоност за развој на дијабетес тип 2 во возрасната доба може да бидат видливи уште на осумгодишна возраст, односно децении пред евентуалната појава на првите симптоми. Ова го покажале резултатите од студија спроведена на Универзитетот во Бристол во која биле анализирани примероци од крв на 4.000 лица во периодот од детството до зрелоста, со цел да се пронајдат можните индикации за дијабетес тип 2.
Научниците го анализирале метаболичкиот и генетскиот профил на повеќе од 4.000 лица на возраст од 8, 16, 18 и 25 години. Тие ги комбинирале генетски податоци со метаболомика – метод кој предвидува мерење на мали молекули во примерок од крв (метаболити, односно мали молекули вклучени во метаболичките реакции во клетките) со цел да се идентификуваат модели специфични за првата фаза од развојот на типот 2 дијабетес.
НАЧИН НА РАЗВОЈ
Откриено е дека веќе на осумгодишна возраст, децата со поголема тенденција за развој на дијабетес тип 2 може да имаат нерамнотежа во нивото на холестерол, со недостаток на добар или ХДЛ холестерол и зголемено ниво на лош или ЛДЛ холестерол. Покрај тоа, кај лица на возраст помеѓу 16 и 18 години, може да се воочат зголемени воспалителни вредности. Уште еден показател за предиспозиција за дијабетес тип 2 кој е откриен во ова истражување е зголемено количество на некои аминокиселини во крвта на младите луѓе.
“Ваквите резултати ја откриваат биологијата на дијабетесот и начинот на кој се развива и сугерираат можни нови цели за рано делување, вклучително и превентивни терапии“, објаснуваат авторите на студијата, додавајќи дека дијабетесот тип 2 е болест која е почеста кај повозрасните луѓе, но сега е очигледно дека знаците на предиспозиција за негов развој се гледаат на многу рана возраст, околу 50 години пред да се дијагностицира.
