Колку и да сте се подготвувале на тоа, првите денови на доење секогаш претставуваат шок за мајката. Бебето не знае колку е часот, а вие секогаш морате да бидете тука за него, што подрзабира и навечер.
Постојат неколку работи кои може да ги направите и да си го олесните ноќното доење.
Ноќните подои се важни
Прво што треба да знаете е дека ноќното доење е многу важно. Вашето тело ќе произведува повеќе пролактин (хормон кој го поттикнува производството на млеко), доколку доите и преку ноќ. Значи, ноќното доење ја помага лактацијата.
Најдете положба која ви одговара
Научете се колку што можете порано, да доите на страна. Кога веќе не можете да спиете, барем бидете во лежечка положба и колку толку да одморате.
Бебето нека ви биде близу
Најдобро е првите недели, креветчето на бебето да биде во собата во која спиете. Тоа не само што ќе ви го олесни ноќното хранење, туку и побрзо ќе можете да изреагирате и ако бебето се расплаче. Истражувања покажале дека шансите за синдром на изненадна смрт кај новороденче, се помали ако тоа спие со родителите во соба. Доколку доите, а не пушите (и не сте пушеле за време на бременоста) и користите лесна покривка, може да ја разгедате и можноста за делење на креветот со бебето. Искусни мајки велат дека биле многу понаспани кога бебето спиело со нив во кревет и почесто продолжувале со доење и по шестиот месец од животот на бебето.
Тргнете го часовникот
Во собата во која спиете, не ставајте часовник. Докажано е дека мајките се чувствуваат уште полошо кога знаат дека, на пример, спиеле само два часа од претходното будење на бебето.
Не палете светло
Кога бебето ќе се разбуди да цица, потрудете се собата да остане што “потивка“ и мрачна, како би се зголемиле шансите, бебето по подојот веднаш да продолжи со спиење. Доколку ви е потребно светло за да видите дали бебето добро ја фатило градата и дали влече како што треба, пригушена лампа е многу подобар избор од палење светло.
Спијте во удобни пижами кои се погодни за доење
Ноќница, пижами или маица на копчиња се многу подобар избор од оние кои се навлекуваат преку глава. Ќе ви биде полесна да го надоите бебето. Некои жени сакаат и навечер да носат градник за доење, но со него мора да бидете внимателни, бидејќи носењето градник навечер може да доведе до запушување на млечниот канал или маститис.
Организирајте се
Покрај креветот, ставете пелени, шише со вода, па дури и малку храна за да не мора да станувате во текот на ноќта.
Олсенете го чистењето
Долку ви тече млеко или бебето повраќа, задолжително покрај креветот имајте пешкир или тетра пелена која ќе ја ставите под бебето за време на доењето.
Дремете кога е тоа можно
Во текот на денот, кога и да можете дремете. Тоа секако е многу потешко ако имате и постаро дете или деца, но ако успеете ќе ви биде многу полесно да ја издржите ноќта. Замолете го партнерот да ви помогне и да го изнесе постарото дете во парк за да вие малку одморите.
