Основата за рани срцеви заболувања може да започне не во текот на детството или во годините што следат, туку во матката, сугерира новото канадско истражување. Имено, канадските научници откриле силна врска помеѓу факторите на ризик за срцеви заболувања кај тинејџерите и младите и дијабетесот тип 2 кај мајката или гестациски дијабетес.
Децата на мајките кои имале дијабетес за време на бременоста имале 30 до 80 проценти поголеми шанси да развијат срцеви заболувања и два до три пати поголеми шанси да развијат фактори на ризик за срцеви заболувања, како што се висок крвен притисок (хипертензија) или дијабетес.
Ова истражување анализирало податоци од повеќе од 290.000 деца и 190.000 мајки. Се покажало дека 2,8 отсто од децата биле изложени на гестациски дијабетес додека биле во утробата, а 1,1 отсто од нив на веќе постоечки дијабетес тип 2.
Се смета дека контролата на дијабетесот е особено важна за време на бременоста и може да се постигне преку исхрана, лекови по потреба и добра соработка со здравствените работници.
Инаку, жените со покачен шеќер во крвта за време на бременоста раѓаат поголеми деца и се изложени на поголеми предизвици при породување, но и на компликации.
Извор: CMAJ
