Со отворањето на училиштата во Велика Британија, лекарите забележале три нови симптоми кај децата заразени со коронавирус – дијареја, повраќање и болки во стомакот, се вели во извештајот на научниците од Универзитетот во Белфаст.
Но, како што тврдат, Националната и здравствена служба на Велика Британија засега не ги вклучила на списокот на потенцијални симптоми на COVID-19, па и понатаму се наведуваат треската, кашлицата и губењето на вкусот и мирисот.
Од друга страна, Американскиот центар за контрола и превенција на болести како можни симптоми веќе ги потврди повраќањето и дијарејата.
„Откривме дека дијарејата и повраќањето се симптоми кои се забележани кај некои деца заразени со коронавирус и веруваме дека треба да се размисли за нивно вклучување на списокот“, изјави за Би-Би-Си д-р Том Вотерфилд од Универзитетот во Белфаст.
Д-р Вотерфилд и неговите колеги проучувале случаи на 68 деца со просечна возраст од 10 години. Најчестиот симптом бил покачена телесна температура, која била забележана кај една третина од децата, потоа следува кашлицата, а губењето на мирис и вкус бил симптом во шест случаи. 13 деца пријавиле дијареја, повраќање и болки во стомакот. Ниту едно од овие 68 деца не било хоспитализирано. Приближно 50 проценти од нив биле асимптоматски.
„Ова истражување покажува дека приближно половина од заразените деца се асимптоматски кога ќе се заразат со COVID-19“, додал д-р Вoтерфилд.
