Доењето може да пружи долгорочни благодати за срцето и на мајката и на детето, истакнуваат од Американското здружение за срце. Имено, нова анализа покажала дека жените кои доеле најмалку еднаш во текот на животот имале за 17% помал ризик од смрт од кардиоваскуларни болести, од оние кои никогаш не доеле.
Исто така, жените кои доеле имале за 12% помала веројатност дека ќе доживеат мозочен удат, 14% помала веројатност дека ќе имаат срцева болест и 11% помала веројатност дека ќе развијат кардиоваскуларни болести во текот на наредните 10 години.
Анализата покажала и дека децата кои пиеле мајчино млеко дури и кусо време, имале понизок крвен притисок на возраст од три години во споредба со децата кои никогаш не пиеле мајчино млеко. Без оглед на тоа колку долго децата биле доени и дали добивале и друга дохрана и храна, крвниот притисок бил понизок кај доените деца.
Постојат сè повеќе докази кои упатуваат на тоа дека доењето може да игра важна улога во намалувањето на ризикот од кардиоваскуларни болести. Познато е дека ризик факторите за кардиоваскуларни болести, вклучително и висок крвен притисок (хипертензија), можат да започнат уште во детството, така што давањето мајчино млеко детето дури и неколку дена во детството е добар почеток на живот на здраво срце, истакнуваат стручњаците.
Затоа, Американското здружение за срце ги советува мајките да ги дојат своите деца 12 месеци, преминувајќи на други дополнителни извори на исхрана почнувајќи од околу 4 до 6 месечна возраст, за да се обезбедат дека исхраната содржи доволно микронутриенти.
