Главоболките во детската возраст се јавуваат релативно често. Најчесто се работи за безопасен симптом кој се јавува во состав на воспаление на дишните патишта проследена со температура, вели педијатарот Миливој Јованчевиќ.
“Главоболката може да биде предизвикана од бактериско воспаление на слузницата на горните дишни патишта (воспаление на синуси кај постари деца), грип, но и други вируси. Главоболката често се јавува и при инфективна мононуклеоза и овчи сипаници“, вели д-р Јованчевиќ.
Најчесто, објаснува педијатарот во училишната, поретко во предучилишната возраст се јавуваат т.н. тензиски главоболки кои се главоболки поради емоционална напнатост. По правило во вакви ситуации, детето е во добра општа состојба, нема мачнини и во периодите кога не е на училиште, пречките исчезнуваат.
Внимание при долготрајните и силни главоболки проследени со лоша општа состојба
Педијатарот препорачува да се исклучи органската причина за болките (болест) и да се консултира психолог. Ако станува збор за долготрајни или силни главоболки проследени со лоша општа состојба кај детето, осип, мачнина или повраќање, треба да се побара лекарска помош, без одложување, предупредува д-р Јованчевиќ.
“Главоболката може да биде знак за тешка и по живот опасна болест, затоа е потребно внимание. Ако главоболката не престанува и по примена на лекови против болка, ако општата состојба на детето е лоша, ако има висока телесна температура и повраќа, тогаш веднаш треба да се отиде на лекар. Во наведената ситуација треба да се исклучи воспаление на мозочната обвивка и мозокот – менингитис и енцефалитис. Во случај да се потврди постоење на воспаление, исклучително е важно веднаш да се почне со лекување, оти така се зголемуваат шансите за целосно излекување без последици“, алармира д-р Јованчевиќ.
Тој додава дека и појавата на ненадејна силна главоболка без знаци на инфекција (детето нема температура, нема знаци на настинка, ниту осип) исто така упатува на внимание, особено ако е проследена со мачнина, повраќање или ако детето се жали на пречки во видот ( на пример може да се јави да не гледа на едното око или да не гледа еден дел од видното поле).
