Родител во просек објавува речиси 1.500 фотографии на своето дете на социјалните мрежи пред да наполни пет години. Истражувањето е спроведено помеѓу 2.000 родители кои користат социјални мрежи од една британска веб страна, која се занимава со предизвиците на дигиталното време.
Посебно загрижува ако се земе предвид дека нешто повеќе од една четвртина од родителите имаат подесувања на јавен пристап. Тоа значи дека секој може да види што објавуваат, дури и ако не се пријатели на социјалните мрежи.
Денес не е невообичаено ниту фотографии на децата да се поставуваат на интернет пред да се родат и тоа е тренд што го следат се повеќе идни родители. Не е реткост ниту родителите да прават Инстаграм и Фејсбук профили на своите мали деца.
Имајќи ги предвид овие податоци, УНИТАС, меѓународна хуманитарна организација која се занимава со борба против трговијата со луѓе, укажува на потребата за едукација на родителите и децата за безбедно и одговорно однесување во виртуелниот свет.
Ризикот од објавување на детски фотографии е голем
Иако има варијации во зачестеноста и користењето на интернет, проблемите и предизвиците се слични насекаде во светот. Ризиците од објавување детски фотографии се големи, бидејќи предаторите на Инстаграм ги демнат профилите на родителите на кои се наоѓаат вакви фотографии.
Слики на деца преземени од социјалните мрежи на нивните родители сочинуваат дури 50 отсто од материјалот пронајден на сајтовите за педофили во Австралија. Иако копираните фотографии сами по себе не би се сметале за материјал за експлоатација, на тие страници често се проследени со коментари во кои детето е експлицитно претставено како сексуален објект.
Бидејќи нема целосна заштита на податоците на Интернет, треба да избегнувате објавување на името и презимето на вашето дете и адресата. Многу е важно да ја исклучите локацијата и да не објавувате слики на кои се гледа и препознава вашата улица. Исто така и делот каде што живеете или училиштето каде учи детето.
Ако сепак одлучите да објавите фотографија од вашето дете, совет е јасно да не се гледа профилот на лицето. Задолжително подесете вашиот профил да биде приватен, така што само вашите пријатели ќе можат да пристапат до содржината што ја споделувате.
Притоа, најбезбедно е меѓу пријателите да имате само лица кои ги познавате во реалниот живот. Зад виртуелните пријатели можат да се кријат предатори, кои во секоја секунда на интернет ги има повеќе од 750.000. Тие многу лесно наоѓаат можни жртви следејќи ги навиките, однесувањата, местата кои родителите ги посетуваат со своите деца.
