Нилс Бергман, шведски лекар, кој е долгогодишен истражувач и експерт за породување и има 18.000 породувања, вели дека постојат само две вистини за мајката и за бебето по породувањето:
- Бебето и мајката не треба да се раздвојуваат по породувањето
- Мајката никогаш не смее да биде сама по породувањето
Овие вистини според д-р Бергман се апсолутни и секогаш треба да се тежнее кон нив. Одвојувањето не смее да се случи, вели тој. Секако, се согласува дека постојат здраствени ситуации и компликации по кои мајката и бебето мораат да бидат одвоени, но во повеќето случаи мораат да бидат заедно.
Нема докази, ниту основ мајката и детето да се раздвојуваат по породувањето, истакнува д-р Бергман. Важно е да се сфати како бебето функционира, вели тој. Околината на бебето е мајката. Бебето е 100% зависно од мајката. Дури и едногодишно дете е 99% зависно од мајката. Бебето зависи од мајката поради сензорни и социјални стимулации.
Одвојувањето на предвреме родените деца и нивниот престој во инкубатори долгорочно лошо влијае на мозокот на тие бебиња. Тие се целосно лишени од мајчиното влијание, глас, допир и утеха кои го хранат бебешкиот физички, психолошки и невролошки развој. Недостатокот на заштита и возрасна поддршка, детето го доживува во токсичен стрес. Одвојувањето на мајката и бебето во сите случаи претставува токсичен стрес.
