Парите не се најважната работа на светот, но го олеснуваат животот на многу начини, па не е ни чудо што многу родители сакаат нивните деца да бидат успешни и во оваа финансиска смисла. Ако тоа е и ваша желба, ќе бидете изненадени од фактот дека една особина стекната во детството може многу да влијае на шансите за успех подоцна во животот!
Имено, психолози во Нов Зеланд од 1972 година следеле 1.000 деца од градот Данедин со цел да ги откријат факторите од детството кои имаат најголемо влијание врз нивниот развој и живот подоцна, кога ќе пораснат.
Се покажало дека подоцнежниот успех нема баш многу врска со образованието, вмрежувањето или воспоставувањето контакти или работната етика. Наместо тоа, научниците утврдиле дека нешто друго има многу поголема влијание – најуспешни возрасни луѓе се оние кои додека растеле покажувале поголема самодоверба од своите врсници, имале високо ниво на дисциплина и емоционална интелигенција.
Научниците за групата од овие три карактеристики зборуваат како за емоционален количник или едноставно емоционална интелигенција (EQ).
Луѓето кои имаат поголема емоционална интелигенција покажуваат и поголема емпатија, имаат попозитивен став, донесуваат поинформирани одлуки и полесно признаваат кога грешат.
Од друга страна, децата со низок EQ имаат помали шанси да бидат финансиски успешни кога ќе пораснат. Според научниците, тие имаат поголеми шанси да имаат помали примања, лоши навики за трошење до 30-тата година од животот, а помала е веројатноста да имаат заштеда, свој дом или да вложат пари во нешто.
Проценките на EQ на учесниците во студијата биле вршени во редовни интервали во текот на детството, на возраст од три, пет, седум, девет и 11 години, со набљудување на однесувањето на децата, интервјуирање на нивните родители и спроведување анкети со нивните наставници.
Утврдено е дека постои силна врска помеѓу способноста на детето редовно да ги толкува и контролира своите емоции и неговиот иден професионален успех во зрелоста.
„Сите деца понекогаш имаат проблем со самоконтролата, но оние со низок EQ покажале лоша самоконтрола во различни ситуации и години“, објаснуваат научниците од Универзитетот во Отаго.
Научниците исто така истакнале дека високиот EQ може да биде важен фактор на работното место, кој влијае на тоа колку добро вработените соработуваат и комуницираат со своите колеги на работа.
Емоционалната интелигенција се развива уште во детството, најмногу со помош на блиски, возрасни луѓе во околината кои поттикнуваат комуникација, ги прифаќаат нивните емоции и отворено и искрено зборуваат за своите проблеми.
