Ново истражување покажало дека секојдневната употреба на солени капки за нос може да го скрати времетраењето на настинката кај децата за дури два дена. Освен тоа, ја намалува и заразноста, што значи дека помалку членови од семејството ќе се разболат.
Детската лекарка и популарна педијатарка на социјалните мрежи, Меган Мартин, го сподели овој совет со родителите, нагласувајќи дека станува збор за „евтино“ и „едноставно“ решение кое им помага на децата побрзо да оздрават и спречува ширење на вирусот во домаќинството.
„Ова е едноставен начин да го скратите времето на болеста кај вашето дете, да ја намалите количината на лекови што треба да ги користите и да го намалите бројот на заболени во домот“, објасни д-р Мартин.
Како делува?
Д-р Мартин се повика на резултатите од студијата ELVIS-Kids, во која истражувачите го тестирале ефектот на хипертоничен солен раствор (околу 2,6% солена вода) кај настинати деца. Децата добивале по три капки во секоја ноздра, четири пати дневно, во период од пет дена – а резултатите биле импресивни.
Од 407 деца вклучени во истражувањето, околу 300 се разболеле. Половина од нив користеле солени капки, додека другата половина добивала вообичаена нега за настинка. Децата што користеле солени капки оздравеле во просек за шест дена, додека на останатите им биле потребни осум дена.
Дополнително, помал број членови од семејствата се заразиле – 46% во групата што користела солен раствор, наспроти 61% во контролната група.
„Ова е евтино, лесно и со низок ризик, а им помага на децата побрзо да оздрават и го спречува ширењето на болеста – што е одлично“, заклучи д-р Мартин.
Искуства на родители
Родителите што го испробале овој совет се воодушевени од резултатите. Една мајка напишала:
„Го видов ова истражување пред неколку месеци и веднаш купив солени спрејови за целото семејство. Ги користиме секогаш кога сме болни – ФУНКЦИОНИРА!!!“
Друга мајка го споделила своето искуство:
„Откако го следиме овој совет, здравјето на мојата ќерка значително се подобри. Порано кашлаше и беше болна со недели, а сега користиме солен раствор, го чистиме носето и сè поминува за 2-3 дена!“
