Повеќето родители сакаат да воспитаат среќни и сигурни деца. Меѓутоа, понекогаш тие ненамерно негативно влијаат на развојот на нивната самодоверба, но и самопочит. Освен тоа, со оглед на мноштвото достапни совети, родителите можат да се изгубат во тоа што да прават или да не прават. Детскиот психолог и едукатор за родители, Џејми Блох, споделува едноставна навика што родителите можат да ја практикуваат за да им помогнат на децата да развијат самодоверба.
„За ова ви се потребни 10-20 минути дневно. Значи, пронајдете ги вашите деца додека се занимаваат со нешто што ги интересира. Воспоставете контакт со очите и кажете: „Леле, тоа изгледа толку интересно. Можеш ли да ми кажеш повеќе за тоа бсо кое се занимаваш во моментов?“, вели психологот.
Потоа ги советува родителите внимателно да слушаат што велат нивните деца. Таа објаснува: „Откако ќе ви покажат или ќе ви кажат што прават, кажете: „Многу ми е мило што ми покажа и ми кажа што правиш“.
Таа, исто така, им порачува на родителите да користат суптилен говор на телото, како што е лесен допир по рамото или прегратка, и да им кажат колку ги сакаат.
„Помагањето на децата да се чувствуваат сакано ќе помогне да се изгради нивната самодоверба и да се зајакнат нашите врски со нив низ времето заедно. Запомнете, тоа не мора да биде ништо комплицирано. Најдете неколку минути во вашиот ден и покажете интерес за нивното хоби“, вели Блох. Таа тврди дека родителите мора да им дозволат на децата да се чувствуваат ценети за да ја видат сопствената вредност.
„Покажувањето вистински интерес и одвојувањето време за децата е вештина број еден што можеме да ја искористиме како родители за да ја зголемиме нивната самодоверба“, заклучува психологот.
