Во време кога пандемијата на коронавирус е во опаѓање во многу земји и се укинуваат мерките, некои луѓе тоа го поздравуваат, а некои сметаат дека некои мерки, како носењето маски, треба да продолжат да се применуваат во ситуации кога има многу луѓе во мал простор.
Маските за лице обезбедуваат најголема заштита од ширење на честички со вируси во воздухот кога сите ги носат, пишува Си-Ен-Ен, додавајќи дека истражувањата сугерираат дека маските, доколку не ги носат другите лица, можат да го заштитат оној што ја носи, делувајќи како бариера помеѓу честичките и неговиот нос и уста.
Маските како N95 и KN95 генерално се подобри од хируршките маски или платнените маски бидејќи можат подобро да се прилепат на лицето. А хируршките маски прават подобра работа во филтрирањето отколку платнените маски
„Вчера патував со авион откако беше укината задолжителната маска во јавниот превоз. Имав маска на лицето за време на целиот лет“, рече Крис Капа, професор по градежно инженерство и инженерство за животна средина на Универзитетот во Калифорнија, Дејвис, кој ги проучува аеросолните честички и маските.
Додека патувал од Сакраменто во Сан Диего, забележал дека бројот на патници кои носеле маски за време на летот се намалува.
„Ќе продолжам да ја носам мојата маска N95 додека патувам уште некое време. Лично, повеќе сум загрижен кога сум во мали, преполни простори како што се авионите, во споредба со големи, релативно отворени простори како што се аеродромите“, вели Капа.
„Нивото на заштита, кога само вие носите маска, во голема мера зависи од два фактора: колку добро вашата маска се прилепува на вашето лице и колку ефикасно материјалот на маската ги филтрира честичките кои би можеле да носат вируси. Маските како N95 и KN95 генерално се подобри од хируршките маски или платнените маски бидејќи можат подобро да се прилепат на лицето. А хируршките маски прават подобра работа во филтрирањето отколку платнените маски“, вели Капа.
„Различни маски ќе одговараат на различни лица подобро или полошо, па затоа е важно да ја пронајдете онаа што добро ви одговара“, рече тој.
„Дури и најдобрата маска е добра онолку колку што добро се прилепува. Добро прилепената N95 маска може да ја намали количината на потенцијално заразни честички што ги вдишувате за повеќе од 20 пати.“
Дури и ако сите околу вас се без маска, Капа вели дека носењето добро прилагодена N95 маска може да го намали количеството на заразни честички што можете да ги вдишите.
Според американскиот Центар за контрола и превенција на болести (ЦДЦ), N95 маските можат да филтрираат најмалку 95 проценти од честичките ако се стават правилно на лицето. Хируршките маски или маските за еднократна употреба се околу 5 до 10 проценти помалку ефикасни од N95
„Кога теоретски би постоеле 100 заразни честички што би требало да ги вдишите доколку сте без маска, вие би вдишиле 5 или помалку со N95 маска која добро е прилагодена на вашето лице“, вели тој.
„Маските од ткаенина што се користат кога недостасува друга заштитна опрема можат да филтрираат големи капки. Но, поефективните маски, како N95, можат да филтрираат и помали аеросоли или честички што ги издишуваат заразените луѓе“, рече Ерин Бромаж, вонреден професор по биологија на Универзитетот Масачусетс Дартмут.
Според американскиот Центар за контрола и превенција на болести (ЦДЦ), N95 маските можат да филтрираат најмалку 95 проценти од честичките ако се стават правилно на лицето. Хируршките маски или маските за еднократна употреба се околу 5 до 10 проценти помалку ефикасни од N95, вели Бромаж.
Студијата на ЦДЦ, објавена во февруари, покажа дека луѓето кои во периодот помеѓу февруари и декември 2021 година секогаш носеле маска во затворен простор имале помала веројатност да бидат позитивни на Ковид-19 отколку луѓето кои не носеле маски.
Носењето маска „ги намалило шансите за позитивен тест“ на Ковид-19 за 56 отсто кај оние кои носеле платнени маски, 66 отсто кај оние кои носеле хируршки маски и 83 отсто кај оние кои носеле N95 или KN95 маски, во споредба со луѓето кои воопшто не носеле маска, според ЦДЦ.
„Ако никој освен вас не носи маска, тие проценти би можеле да паднат“, изјави Капа за Си-Ен-Ен.
