Група детски терапевти се согласуваат дека една работа во денешно време има големо влијание врз среќата на децата.
Како што пишува HuffPost, најголемата закана за среќата на децата денес е немилосрдната „потрага“ на родителите по среќата на нивните деца, што на долг рок може да има контрапродуктивно влијание врз нивната благосостојба.
Претпоставувајќи дека децата треба постојано да бидат среќни, им ја ускратуваме можноста да научат да се справуваат со спектар на различни емоции на здрав начин. Исто така, родителите се толку фокусирани на достигнувањата на своите деца што со фалење на нивниот успех може да ризикуваат децата да не знаат колку се сакани и ценети независно од тие достигнувања.
Тие откриваат неколку совети за родителите кои се корисни за поставување на темелите на емоционалното здравје на децата и давање шанса да почувствуваат среќа.
- Нормализирање на сите чувства, не само среќа
Многу е лесно за возрасните да го замислат детството како безгрижно поглавје од животот, но на децата им правиме лоша услуга кога претпоставуваме дека нивните денови се целосно безгрижни.
“Многу возрасни можеби мислат дека децата се среќни и немаат за што да се грижат. За жал, тоа не е вистина. Децата чувствуваат силни емоции и тешки стресови, исто како и возрасните”, посочува педијатрискиот психолог Ариана Хоет.
Природен инстинкт е да се заштитат децата од лоши работи, но тоа влијае на нивната способност да научат да се справуваат со сите емоции.
„Заштитата на децата од стрес и тешки емоции може да ги спречи да развијат отпорност и да ги отежни идните предизвици“, објаснува детскиот психолог Џенифер Круз. Таа додава дека е важно да ги научиме децата дека и негативните емоции имаат вредност. „Стравот може да не заштити, лутината ни помага да знаеме дека сме повредени, тагата може да не поврзе со она што е важно“, истакнува психологот.
Психолозите се согласуваат дека е важно децата да се подготват да се справуваат со предизвиците и да знаат кога да побараат помош, но и да им се објасни дека неуспехот е само дел од животот што понекогаш ќе го доживеат.
- Секојдневен разговор со деца
Здравиот однос родител-дете е важен фактор кој го намалува стресот во животот. Секојдневните разговори или проверки за тоа како се чувствува детето им овозможуваат на родителите да создадат здрава врска и однос со своите деца, а во исто време им даваат увид во тоа како детето размислува и чувствува за нивните секојдневни искуства, истакнува Ариана Хоет.
Таа додава дека ова е еден од одличните начини родителите да бидат во тек со емоционалните искуства на своето дете. Разговорите може да се случат на трпеза, пред спиење или додека сте во автомобил со детето. Оваа практика им овозможува на родителите да го охрабрат детето да зборува и да ги препознае сопствените чувства и да најде начини да се справи со нив.
- Размислете за начинот на кој ги фалите децата
Постојаното фалење на достигнувањата и успесите на децата понекогаш може да има спротивен ефект. Наместо да се фокусираат на достигнувањата на децата, родителите треба да даваат коментари за вредноста на децата независно од овие достигнувања. Ако децата постојано и само се фалат за нивните достигнувања, тие би можеле да мислат дека ќе бидат пофалени во животот само ако постигнат резултати.
Ова врши голем притисок врз децата и предизвикува стрес доколку тие имаат полоши резултати од очекуваното.
Родителите треба да го истакнат она што го сакаат кај своите деца: нивната емпатија, хумор, добрина, начинот на кој ги решаваат проблемите и слично.
