Децата учат како да се извинат преку песни и во училиштата. Сите како деца сме учеле четири волшебни зборови: благодарам, молам, повели, извини. Меѓутоа, на возрасните често не им е нагласено зошто е важно да им се извинат на децата, а ако децата не ве видат како се извинувате, можеби нема да научат да се извинуваат. Ова може да им отежне да ги разберат и да ги изразат своите емоции.
Зошто е важно извинувањето?
Родителите често се пример кој децата можат да го имитираат. Ако видат дека родител презема одговорност, покажува сочувство и се извинува, експертите велат дека детето најверојатно ќе го направи истото.
„Може да ви се чини необично да му се извините на вашето дете, особено ако такво однесување не ви било прикажано додека сте биле дете“, објаснува терапевтот Кејт О’Брајан.
„Ако ова е ваше искуство, можеби имате интернализирани пораки за извинување, како што е верувањето дека кажувањето „жал ми е“ е знак на слабост или дека грешките се поврзани со срам“.
Кога родителите им се извинуваат на своите деца, тоа може да ги подобри нивните социјални вештини, на пример, да им помогне да создаваат и одржуваат пријателства, да развијат емпатија и да ја подобрат нивната способност да изразат каење, да простуваат и да решаваат проблеми. Накратко, тоа ги учи децата на емоционална интелигенција, наведува овој експерт за родителство.
Како да им се извините на децата?
Возрасните кои не добиле извинување како деца може да имаат потешкотии да им се извинат на сопствените деца кога ќе станат родители. Недостатокот на искуство со извинување во детството може да го отежне пренесувањето на оваа вештина на сопствената родителска улога, што може да влијае на односите со нивните деца. Ова се некои од советите на експертите.
1. Почитувајте ги нивните чувства
Пред се, прашајте ги дали се подготвени да разговараат и ако не се подготвени да го прифатат вашето извинување во моментот, не ги присилувајте.
2. Извинете се и преземете одговорност
Кога се извинувате, не барајте изговори за она што сте го направиле. Признајте што сте направиле и дајте им до знаење дека сте свесни како тоа влијаело на нив. Ова им помага на децата да градат самодоверба и да ги признаат своите грешки.
3. Информирајте ги што правите за да ја поправите грешката
Кажете им дека сте подготвени да се подобрите, а совет за тоа кое однесување им пречи, можете да побарате и од самите нив.
