Водечкиот американски стручњак за инфективни болести Ентони Фаучи изјави дека коронавирусот можеби ќе се појавува во неколку циклуси и дека враќањето на целосната нормалност во секојдневниот живот, веројатно не може да се очекува оваа година.
“Се надеваме дека одреден степен на вистинска нормалност ќе биде воспоставен во наредната година, или така некако, но не мислам дека тоа ќе биде оваа есен или зима“, изјави Фаучи во интервју за британски Телеграф, додавајќи дека коронавирусот сепак ќе биде нешто подолго присутен.
Фаучи исто така истакна дека не може да се очекува скоро укинување на забраната за патување на некои меѓународни релации, и дека, судејќи по стапката на ширење на заразата, за тоа ќе биде потребно да поминат месеци, а не само недели.
Но, од друга страна, Фаучи изрази оптимизам во поглед на успешниот развој на вакцина против новиот коронавирус.
“Имаме потенцијални вакцини – четири или пет, кои значајно напредуваат… На основ на се досега видено во резултатите во рана фаза, можно е да се замисли дека ќе добиеме две или три успешни вакцини“, објасни Фаучи.
