Европската агенција за лекови (ЕМА) вчера објави дека го започнала оценувањето на безбедноста на примената на вакцината на Фајзер против КОВИД-19 за возрасна група од 12 до 15 години, бидејќи производителот побарал одобрување за таа возраст во ЕУ и во САД.
За децата се уште не постои вакцина против КОВИД-19. Децата се помалку склони од развивање на тешка форма на болеста и нивната имунизација досега не беше приоритет, но тие се значаен дел од популацијата и треба да се вакцинираат за да се спречи ширењето на вирусот, сметаат стручњаците.
Европската агенција за лекови вчера објави дека нејзиниот Одбор за лекови за хумана употреба “ ќе спроведе забрзана оценка на податоците на компанијата која продава Comirnaty“. Така сее вика вакцината што ја развија Фајзер и Бионтек.
Тие податоци вклучуваат резултати од големо клиничко испитување кое е во тек, а кое опфаќа адолесценти на возраст од 12 години па нагоре, наведува ЕМА.
“ЕМА ќе информира за резултатите на својата проценка, кои се очекуваат во јуни, освен ако не бидат потребни дополнителни информации“, наведуваат од Агенцијата.
Фајзер во петокот објави дека побарал од ЕМА да го прошири одобрувањето за користење на нивната вакцина во ЕУ, на возрасна група од 12 до 15 години, со оглед дека вакцината засега е одобрена за лица над 16 години.
Барањето се темели на резултати од клиничкото испитување во трета фаза, објавени кон крајот на март, кое покажало дека нивната вакцина е “100 проценти ефикасна“ кај таа возрасна група и дека “општо добро го поднесува“.
