Истражувачите од Универзитетот Дјук започнаа со тестирање на вакцината против Ковид-19 на Фајзер кај деца под 12-годишна возраст. Од компанијата за Си-Ен-Ен изјавија дека најмалку две деца веќе ја добиле првата доза.
- Вакцината на Фајзер моментално има овластување за итна употреба од американската Агенција за храна и лекови кај лица на возраст од 16 години и постари
Фајзер ги започнува испитувањата на вакцината прво кај деца помеѓу 5 и 11 години за да се утврди соодветната доза. Вакцините ќе започнат со 10 микрограми. Доколку се толерира таа доза, испитувањето ќе ескалира на 20 микрограми, а потоа на 30 микрограми. Доза за возрасни на вакцината на Фајзер има 30 микрограми. Постои и опција од 3 микрограми. Како и кај возрасните, децата ќе бидат вакцинирани со две дози, во интервал од 21 ден.
Доколку се толерира дозата од 10 микрограми во групата на деца стари 5-11 години, испитувањето ќе го следи истиот процес за деца на возраст од 2 до 5 години. Доколку се толерира во таа возрасна група, следно ќе бидат испитувања на вакцини за најмладите деца, помеѓу 6 месеци и 2 години старост.
Фајзер веќе ја евалуираше вакцината кај 2.259 деца на возраст од 12 до 15 години. Од компанијата за Си-Ен-Ен изјавија дека наодите за подносливост се доволно силни кај оваа возрасна група за да се охрабрат испитувањата кај помладите деца. Тие предвидуваат дека наскоро ќе можат да ги споделат податоците за безбедноста и ефикасноста на вакцината кај постарите деца.
Резултатите од испитувањата кај децата под 12-годишна возраст се очекуваат до крајот на 2021 година.
