Фармацевтските компании веројатно нема да пронајдат единствен лек за КОВИД-19, туку разни третмани за различни групи на пациенти, изјави вчера претседателот на Меѓународната федерација на фармацевтски производители и здруженија (IFPMA), Томас Куени.
“Поминавме долг пат, но мораме искрено да признаеме дека некои надежи ни угаснаа. Наверојатно нема да има единствен лек“, вели претседателот на IFPMA, Куени за време на обраќањето до медиумите во Женева.
Тој додава дека бројот на потенцијални третмани за пациентите со КОВИД-19 кои се истражуваат или се во фаза на тестирање е зголемен на 300, во споредба со 140, колку биле евидентирани кон крајот на месец март.
Фармацевтите истражуваат три главни начини на борба против вирусот: лекови кои директно го напаѓаат, оние кои делуваат преку имуниот систем и оние кои делуваат на симптомите на воспалението.
Некои лекови кои се тестираат ветуваат, а постоечките лекови кои се испробани во борбата против КОВИД-19 доведоа до различни резултати, тврди Меѓународната федерација.
