Времето овие денови е непредвидливо – од невообичаена топлина што некои ги потсетува на лето, додека на други им носи главоболки, па сè до силен ветер и дожд што никому не се допаѓа.
Студените денови доаѓаат и си одат, што значи дека веќе сме добро навлезени во шарената есен, а на прагот нè чека зимата – онаква каква што, велат, ја паметиме „од порано“.
Деновите се пократки, ноќите подолги, и многу родители се прашуваат како да ја задржат добрата волја и да ги извлечат децата надвор – подалеку од игрите и екраните.
Додека кај нас ова време најчесто значи „време за во куќа“, бидејќи таму е најтопло и најпријатно, во Норвешка токму ова доба од годината се смета за совршено за уживање во природата – благодарение на нивната вековна традиција наречена friluftsliv.
Што претставува friluftsliv?
Зборот friluftsliv буквално значи „живот на отворено“, а го популаризирал норвешкиот писател Хенрик Ибзен. Оваа филозофија на живот поттикнува секојдневно поврзување со природата – без оглед на временските услови.
За Норвежаните, излегувањето надвор не е активност резервирана само за викендите – тоа е дел од нивната дневна рутина и идентитет. Децата уште од најрана возраст учат дека престојот на свеж воздух носи среќа, здравје и чувство на поврзаност со светот околу нив.
Зошто friluftsliv е добар за семејството
Експертите истакнуваат бројни придобивки:
- Го намалува стресот – престојот во природа го смирува нервниот систем и ја намалува концентрацијата на хормонот кортизол.
- Го подобрува расположението – свежиот воздух, движењето и природната светлина делуваат против сезонската депресија.
- Го зајакнува имунитетот – децата кои минуваат повеќе време надвор се поотпорни на настинки и инфекции.
- Ја зајакнува семејната поврзаност – заедничките прошетки, планинарења или едноставно набљудување птици создаваат драгоцени семејни спомени.
Како да го примениме friluftsliv дома
Норвежаните често велат: „Не постои лошо време, туку лоша облека.“
Значи, не чекајте сонце – само облечете се добро и излезете надвор!
Еве неколку едноставни начини како да го внесете овој пристап во своето секојдневие:
- Кратки семејни прошетки – дури и 10 минути во блискиот парк можат да го подобрат расположението.
- Пикник со ќебенце и топло чоколадо – дури и зимскиот ден може да биде магичен, макар и во сопствениот двор.
- Игра во природа – собирајте лисја, гранчиња, направете „шумски куќички“ или мини авантури.
- Инвестирајте во добра облека – слоевитото облекување прави чуда; децата можат да уживаат надвор и кога врне дожд или снег.
- Уживајте во тишината – зимата во природата има своја убавина. Забавете го темпото и дозволете си да ја почувствувате.
Што можеме да научиме од Скандинавците
Норвежаните веруваат дека природата им припаѓа на сите – секој има право да шета, да истражува и да дише свеж воздух.
Тој дух на слобода и еднаквост длабоко е вграден во нивната култура.
Иако кај нас немаме исто „право на лутање“ како во Норвешка, имаме прекрасни паркови, шуми, езера и реки што нè повикуваат да ги откриеме – дури и кога е студено.
Наместо зимата да ја доживуваме како нешто што треба само да се „преживее“, обидете се да ѝ се радувате – како Скандинавците.
Успорете, прегрнете ги децата, запалете свеќа и излезете надвор, макар и за пет минути. Тоа не е само здраво – тоа е начин да научиме да ја сакаме секоја сезона и да го извлечеме најдоброто од неа.
