Високото ниво на шеќер во крвта може да предизвика проблеми и за бремената жена и за бебето. Бебињата вообичаено имаат поголема родилна тежина кога мајката има гестациски дијабетес, што може да предизвика проблеми при породувањето. Исто така, вашето бебе може да се роди со пониско ниво на шеќер во крвта. Но, со лекување, повеќето жени кои имаат гестациски дијабетес може да го контролираат нивото на шеќер во крвта и да одржат здрава бременост.
Жените кои имале гестациски дијабетес веројатно подоцна во животот ќе развијат дијабетес тип 2. Сепак, дијабетесот може да се ублажи со начинот на живот, така што ќе одржувате здрава телесна тежина, здраво ќе се храните и ќе бидете физички активни.
ШТО ГО ПРЕДИЗВИКУВА?
Панкреасот произведува хормон инсулин. Инсулинот му помага на вашиот организам правилно да го користи и складира шеќерот од храната. Оваа рамнотежа го одржува нивото на шеќер во крвта во правилен распон. За време на бременоста, постелката создава хормони што ја отежнуваат работата на инсулинот. Ова се нарекува инсулинска резистенција. Бремените жени може да добијат дијабетес кога панкреасот не може да произведе доволно инсулин за да го одржи нивото на шеќер во крвта во нормала.
КОИ СЕ СИМПТОМИТЕ?
Гестацискиот дијабетес нема симптоми и затоа на редовните контроли за време на бременоста, меѓу другото, се проверува и нивото на шеќер во крвта. Бременоста предизвикува почесто мокрење и постојано чувство на глад. Ако ги имате овие симптоми, кои се едни од симптомите на дијабетес, тоа не мора да значи дека имате гестациски дијабетес. Разговарајте со вашиот гинеколог.
КАКО СЕ ТРЕТИРА?
Некои жени со гестациски дијабетес можат да го контролираат нивото на шеќер во крвта со правилна и здрава исхрана, редовна и лесна физичка активност. Овој здрав начин на живот може да спречи појава на гестациски дијабетес во подоцнежните бремености и развој на дијабетес тип 2 подоцна во животот.
Гестацискиот дијабетес мора редовно да се контролира кај вашиот матичен гинеколог, а по потреба и со домашни тестови. Доколку е потребно заедно со правилната исхрана, а по препорака на ендокринолог, ќе добивате инсулински инјекции за да можете да го контролирате нивото на шеќер во крвта.
