„Ковид-19 ќе стане слаб како обична настинка, но вакцинацијата и понатаму ќе биде пожелна“, потенцира Сара Гилберт, истакнат британски научник, која беше вклучена во создавањето на оксфордската вакцина, која ја произведува АстраЗенека.
Според неа, коронавирусот што предизвикува Ковид-19 нема да мутира во посмртоносна варијанта, туку ќе стане сличен на коронавирусите со кои живееме долго време.
- Гилберт смета дека Ковид-19 ќе стане како обична настинка
„Веќе живееме со четири различни човечки коронавируси за кои всушност и не размислуваме премногу и на крајот SARS-CoV-2 ќе стане еден од нив. Прашање е колку време ќе биде потребно за да се оствари ова и какви мерки ќе мораме да преземеме во меѓувреме за да успееме тоа да го направиме“, рече Гилберт на вебинарот на Кралското медицинско друштво за варијантите на вирусот.
Готово е со опасните мутации?
Таа додаде дека вирусот нема да може да мутира за да го „победи“ ефектот на вакцината.
Kоронавирусот што предизвикува Ковид-19 нема да мутира во посмртоносна варијанта, туку ќе стане сличен на коронавирусите со кои живееме долго време
„Вирусот не може целосно да мутира затоа што неговиот шилест протеин мора да стапи во интеракција со рецепторот ACE2 на површината на човечката клетка за да влезе во таа клетка. Ако тој го промени својот шилест протеин толку многу да не може да стапи во интеракција со тој рецептор, тогаш не би можел да влезе во клетката. Значи, нема многу места каде што вирусот би можел да отиде за да избега од имунитетот, а и понатаму да биде навистина заразен вирус“, објасни таа.
Гилберт нагласи дека вакцинацијата е клучна за сузбивање на идните пандемии, а подготовката за следната е од витално значење за епидемиите „да не се прошират во повеќе земји“.
