Сигурно безброј пати сте посакале вашето бебе да може јасно да ви каже што сака. Иако не зборува, тоа веќе комуницира – со поглед, движења, насмевки и изрази на лицето.
Според експертите за невербална комуникација, уште од раѓање, бебињата го користат целото тело за да го „разговараат“ со нас. Тие ве гледаат во лице, мафтаат со рачињата, прават мали движења со устата – и токму во тие сигнали се крие нивната порака. На родителите останува да ги „прочитаат“ и разберат тие знаци.
Говорот на рачињата: Покажувањето како прв збор
Помеѓу 8. и 12. месец, бебињата почнуваат да покажуваат со показалецот. Тоа може да биде на чаша, играчка, животно – нешто што го сакаат или што им привлекло внимание.
Вашата улога:
-
Покажете интерес
-
Именувајте го предметот
-
Повторете го зборот неколку пати во реченица
Истражувањата покажуваат дека реакцијата на родителот во овие моменти директно влијае врз развојот на говорот кај детето. Бебето учи дека комуникацијата има ефект – и тоа е првиот чекор кон зборување.
Поглед: Поврзување уште од првиот ден
Бебињата, уште неколку часа по раѓањето, инстинктивно го насочуваат погледот кон лицето на мајката. Овој природен рефлекс им помага да се чувствуваат сигурно и сакано.
Од 6. до 10. недела, бебето почнува подолго да гледа во вас, а преку погледот покажува интерес и емоции:
-
Подига веѓи или ги шири очите = возбуда или љубопитност
-
Одбива да гледа повторно = веќе го запомнило предметот
Следете го погледот на вашето бебе – тоа е еден од најсигурните патокази за неговиот ментален развој.
Фацијални експресии: Емоции без зборови
Бебињата почнуваат да вежбаат изрази на лицето уште додека се во стомакот! Кога ќе се родат, тие веќе имаат способност да искажат:
-
Задоволство (со насмевка)
-
Негативна реакција (затворање уста, вртење глава, исфрлање храна)
Возрасните инстинктивно умеат да ги препознаат овие експресии – верувајте на своето чувство. Ако се прашувате дали нешто му се допаѓа на бебето, следете го неговиот израз на лицето – тоа е најискрениот одговор.
Насмевка: Првата форма на “разговор”
Првата насмевка е еден од најрадосните моменти за секој родител. Обично се појавува околу шестата недела, а со тек на време станува свесен облик на комуникација.
Околу третиот месец, бебето се смее како одговор на глас, лице или движење. Подоцна, помеѓу 8. и 10. месец, се појавува т.н. „насмевка на прифаќање“ – бебето ќе се насмее на играчка и ќе ве погледне, барајќи одобрување, како да вели: „Ова е баш интересно, нели?“
Покажете дека сте го разбрале: погледнете во тоа што го покажува, играјте се заедно, и ќе му ја засилите желбата за комуникација.
Бебињата не зборуваат, но сепак имаат многу што да ни кажат. Нивниот телесен јазик, погледот, гестовите и изразите на лицето се алатки преку кои се обидуваат да се поврзат со нас. Колку повеќе внимавате и реагирате, толку побрзо и полесно ќе се развие нивната способност за вистинска комуникација.
