Бебињата се прекрасни мали човечиња на кои им е потребно комплетно внимание и грижа, но некои појави понекогаш ги загрижуваат родители, иако за нив педијатрите велат дека се вообичаени и нормални.
ГРЧЕВИ
Бебето се грчи, го менува ликот, изгледа напнато… Сето ова може да изгледа необично, но нема место за загриженост. Родителите почнуваат да паничат кога нивното бебе ќе направи нагло движење, ќе преврти со очите или во текот на спиењето се грчи (прави нагло опуштање на дел од телото). Сите тие се последица на незрелост на нервниот систем и обично се губат до шестиот месец од животот. Секако, тоа не значи дека развојот на нервниот систем е завршен, туку дека бебето почнува да прави сакани движења наместо рефлексни.
ТЕЛЕСНА ТЕМПЕРАТУРА
Новороденчињата не можат да ја регулираат температурата на своето тело, бидејќи нивната терморегулација се уште не функционира како што треба. Во првите месец-два треба да водите сметка за тоа дали на бебето му е жешко или му е студено и во склад со тоа преземате одредени мерки. За среќа, телото на новороденото бебе има околу 15 проценти масно ткиво, така што тоа на некој начин е заштитено од губење на топлина.
ДЕХИДРИРАЊЕ
Телото на возрасен човек се состои од 52 до 65 проценти вода, додека тој процент кај бебињата е зачајно повисок од 75 до 85 проценти. Но, покрај тоа што бебешкиот организам содржи висок процент на вода, бебињата многу побрзо може да дехидрираат од возрасните. Зошто? Бидејќи процесот на размена на материите (метаболизам) во нивниот организам е дури четири пати побрз отколку кај возрасен и тие многу побрзо дишат.
ВИД
Бебињата на почетокот не гледаат подалеку од вашето лице и тоа кога ќе им се доближите многу близу. Со тек на време, очните јаболкници на бебето ќе се наместат како што треба, рожницата ќе созрее, па и нивното видно поле ќе се рашири.
ИКАЊЕ
Повеќето бебиња почнуваат да икаат додека се уште се во утробата на нивната мајка. Ова се јавува како резултат на спазам на дијафрагмата која на тој начин почнува да ги „подготвува“ малите бели дробови за дишење. Честите икања продолжуваат уште неколку месеци по раѓањето, бидејќи дијафрагмата сè уште не е во состојба целосно да го контролира протокот на воздух. Не грижете се, икањето не е непријатен феномен за бебето, туку го ослободува од вишокот воздух.
УШИ
Ова е особено чувствително прашање за мајките. Меките и еластични уши на бебето се преклопени и сите се плашат дека нивното бебе ќе остане клемпаво. Некои мајки на бебиња дури им ставаат и капа, иако надвор е 40 под сенка, само за да избегнат „катастрофа“. Нема причина за паника, бидејќи по неколку недели ушите на бебето ќе станат поцврсти и ќе се наместат на вистинското место.
ГЛАВА
Секое новородено бебе има фонтанела на главата – место каде што коските на черепот сè уште не се споени. Природата не дозволува овие коски да се спојат за да за време на породувањето главата на бебето може безбедно, без оштетување, да помине низ родилниот канал. Неколку месеци по раѓањето, тие почнуваат да се спојуваат, за овој процес да се заврши околу првиот роденден.
