Не постои родител на овој свет кој не направил некои грешки на самиот почеток на своето родителство. Затоа, не грижете се, кога ќе станете родител дефинитивно нешто ќе згрешите. Без разлика колку се подготвувате пред да пристигне бебето, без разлика колку совети и инструкции ќе слушнете, без разлика колку искуство сте стекнале, секогаш ќе се провлече некоја грешка – ако воопшто можеме така да ја наречеме – и тоа е сосема во ред.
Ако ништо друго, можеби токму тие грешки ќе ве подготват на друго дете , односно можеби ќе извлечете важни лекции токму од тие грешки и ќе научите нешто од нив. Така обично и оди, затоа не грижете се за тоа, бидејќи вие не сте ниту првиот ниту последниот родител кој греши.
- Одбивање на помош
Кога ќе станете родител за прв пат, сè е покомплицирано бидејќи е прв пат. А тогаш сите ве прашуваат „ви треба ли помош? Ве прашуваат со причина, особено оние кои имаат искуство. Твојата пријателка прашува дали треба да ти зготви нешто, сестра ти сака да го причува бебето додека се одморате, мајка ти прашува дали треба малку да го расчисти станот. Но, вие сметате дека треба да направите сè сами, па затоа одбивате секаква помош. Ова е грешка која секој родител ја прави и ја сфаќа подоцна. Прифатете помош!
- Купување премногу детска облека
Како, но како да не ја купите целата таа преслатка облека?! Постои ли некој кој е имун на овие мини парчиња облека кои се повеќе наликуваат на нашата гардероба?! Како да не купите – сè?! И сите тие ленти за коса, и сите тие капи, мали чевличиња… О, да. Не сте се ни завртеле, а веќе има премногу во корпата. Не постои рецепт за ова, сигурно ќе згрешите, но доброто е што некој сепак може да ја наследи таа облека.
- Стрес поради помали несреќи
Несреќи се случуваат, децата едноставно се повредуваат, а понекогаш и ние случајно ги повредуваме. Подоцна паѓаат, удираат со делови од телото на разни рабови, се сечат, се кршат… Секогаш кога ќе се случи тоа, се чувствувате како да е ваша вина, како да сте најлошиот родител на светот. Имајте на ум едно нешто – вашето дете ќе ги преживее сите тие мали повреди и не, не можете да го заштитите од се на овој свет. Можете да дадете се од себе и да го заштитите вашето дете од најопасните работи, се разбира, но никој не е семоќен.
- Избор на „погрешен“ педијатар
Изборот на вистинскиот педијатар – оној кој одговара и на детето и на родителите – може да ве спаси од многу стрес. Важно е да им верувате на вашите инстинкти, па ако не ви се допаѓа советот на вашиот педијатар, не се сомневајте во себе, туку сменете го докторот – на крајот на краиштата, се работи за здравјето на вашето дете.
- Опседнатост со чистота
Децата се неуредни, и тоа е сосема во ред! Не дозволувајте вашата прекумерна потреба за ред и уредност да ја уништат забавата и да го одредите начинот на кој го поминувате времето со вашите деца. Значи, ако детето сака да научи нешто, во многу ситуации тоа ќе значи неред. Нередот се чисти, малку неред никогаш никого не повреди – а спомените остануваат.
- Принуден прекин на доењето
Гледате ека детето сè уште сака да се дои, но сфаќате дека ви е доста, па дури и премногу, и навистина сакате да престанете со доењето, а освен тоа мислите дека ќе реши многу проблеми (неспиење, плачење…) . Секако, можно е да се одвикне детето од доење – некои полесно, некои потешко. Но, тоа не е баш идеален начин да се збогувате со доењето. Дајте си време на себе и на вашето дете. Знајте дека доењето во одреден момент ќе престане само по себе, затоа, освен ако нема медицинска причина или нешто слично, не терајте го да престане.
- Одложување на воведувањето намирници
Иако некогаш се верувало дека воведувањето на некои намирници треба да се одложи што е можно повеќе, или да се дава на детето што е можно подоцна, сега е познато дека освен одредени намирници за кои се уште важи оваа препорака, децата можат да пробаат многу храна доста рано. Колку подоцна чекаме со одредени намирници, толку потешко ќе биде да ги воведеме или, пак, детето ќе биде потешко да ги прифати.
