Студија спроведена од научниците од Универзитетот во Манчестер и од Центарот за биомедицински истражувања (BRC) сугерира дека Ковид-19 е поврзан со губење на слухот, зуење во ушите и вртоглавица.
Најчести симптоми биле тинитус, потешкотии со слухот и вртоглавица. Некои пациенти пријавиле и болка во увото, а во една студија е забележан и отитис, односно инфекција на средното уво
Професорот Кевин Мунро и истражувачот Ибрахим Алмуфариј откриле 56 студии кои ја покажуваат врската помеѓу Ковид-19 и нарушувањата на слухот и вестибуларни нарушувања. Ги обединиле податоците од 24 студии и процениле дека преваленцата на губење на слухот изнесува 7,6%, тинитус (зуење во ушите) – 14,8% и вртоглавица 7,2%, пренесува „Скај тек дејли“.
Нивната студија е објавена во „International Journal of Audiology“.
„Нашата анализа покажа дека меѓу 7 и 15% од возрасните лица со дијагностициран Ковид-19 пријавиле аудио-вестибуларни симптоми“, рече Мунро.
Најчести симптоми
Најчести симптоми биле тинитус, потешкотии со слухот и вртоглавица. Некои пациенти пријавиле и болка во увото, а во една студија е забележан и отитис, односно инфекција на средното уво.
Податоците биле претежно собрани преку прашалници пополнети од пациенти и преку медицинска евиденција. Мунро посочува дека е потребна обемна клиничка и дијагностичка студија што е можно поскоро за подобро разбирање на долгорочните ефекти на Ковид-19 врз аудитивниот систем.
„Познато е дека болестите како што се сипаници, заушки и менингитис можат да предизвикаат губење на слухот, но малку се знае за тоа како вирусот SARS-CoV-2 влијае на слухот“, рече Мунро, кој во моментов спроведува студија за долгорочните ефекти на Kовид кај пациенти кои биле хоспитализирани поради коронавирус.
Истражувачите наведуваат дека нивната студија сугерира дека постои силна поврзаност помеѓу Ковид-19 и проблемите со слухот.
„Иако овие резултати се алармантни, треба да бидеме претпазливи затоа што сè уште не е сосема јасно дали проблемите со слухот се поврзани исклучиво со Ковид-19 или и со некои други фактори“, додава Мунро.
