Центарот за терморегулација кај децата не е доволно развиен, па кај бебињата често доаѓа до осцилирање на телесната температура, која понекогаш знае да им падне и под 36 степени.
Оваа појава се нарекува хипотермија и обично поминува без никакви симптоми.
Родителите најчесто ја откриваат сосема случајно, ако воочат дека детето е постудено од обично, бледо и невообичаено мирно. Хипотермијата најчесто се јавува кај деца помлади од две години. Лекарите велат дека родителите не треба да паничат, бидејќи оваа појава не е честа, а не е ниту опасна.
Детето треба убаво да се затопли, да се покрие, и да му се даваат топли напитоци – чаеви и супа – објаснуваат лекарите. Ако за неколку часа температурата не се врати во нормала, детето треба да го однесете на лекар. Хипотермијата може да биде последица од вирусна инфекција, но некогаш се јавува и по висика температура, кога родителите претеруваат со употреба на лекови. Важно е да се направи лабораториска анализа, да се проверат леукоцитите. Лекарите велат дека хипотермија најчесто се јавува заради неадекватна употреба на лекови.
Денес родителите се опседнати со висока температура, па немаат мерка кога на децата им даваат антипиретици и често претеруваат, сметаат педијатрите. Така, зголемената телесна температура ќе отиде во друга крајност, односно детето ќе добие хипотермија.
Педијатрите велат дека треба да се биде претпазлив и со туширањето кога се симнува температурата, бидејќи и со разладувањето треба да се внимава.
Големи осцилации
Дигиталните топломери може да излажат. Се случувало родителите да забележат големи осцилации на температурата за кратко време. Во секој случај, не се толку прецизни и точни, особно кај најмладите.
