Подготовката на храна за најмалите понекогаш може да изгледа како вистинска мисија – со толку многу совети на интернет лесно е човек да се збуни. Но, како што вели Џејмс Мекналти-Акројд, лекар во итната служба на Сент Џонс, не мора да биде комплицирано.
„Најважно е да разберете која храна може да претставува ризик од гушење и како тој ризик да се намали“, објаснува Џејмс. „Така и вие и детето ќе бидете помирни, а оброците ќе станат поопуштени и попријатни.“
Тој издвојува неколку намирници што кај малите деца е подобро да се избегнуваат, бидејќи имаат нешто заедничко – често се округли, тврди или лизгави, што ги прави тешки за џвакање и опасни за гушење.
Намирници на кои треба да внимавате:
- Грозје и боровинки – мали, округли и лизгави.
- Шери домати – најдобро е да се исечат на четвртини.
- Јаткасти плодови – тврди и лесно може да се заглават во грлото.
- Мастика за џвакање – мала и лизгава, не е наменета за деца.
- Суров морков – тврд, подобро е да се изренда или исече на тенки стапчиња.
- Желе коцки и гумени бонбони – лизгави и ризични.
- Пуканки – лесните зрна можат да завршат во дишните патишта и да предизвикаат гушење или аспирација.
„Пуканките можеби не изгледаат опасно како другите намирници, но се лесни и детето може да ги вдише или да се загрцне“, предупредува Џејмс. „Дишните патишта кај децата се мали и секоја погрешна трошка може да биде проблем.“
Како да го намалите ризикот од гушење?
За оброците да поминат без стрес, важно е да почитувате неколку правила:
- Секогаш бидете покрај детето додека јаде – најдобро седнати на маса, за да ја држите ситуацијата под контрола.
- Прилагодете ја храната според возраста и развојот на детето и исечете ја на парчиња што лесно може да ги џвака.
- Грозјето и чери доматите ситно исечете ги, а колбасите излупете ги и пресечете ги по должина на мали парчиња.
- Густите намази, како путер од јаткасти плодови или чоколаден намаз, нанесете ги во тенок слој – доволно за уживање, а со минимален ризик.
- Овошјето и зеленчукот со тврда кора, како јаболка или моркови, измијте ги, излупете ги и исечете ги на стапчиња или изрендајте ги.
Правилната подготовка на храната и постојаниот надзор можат да ги направат оброците побезбедни – а и вие и детето помирни. Затоа што најважно е храната да биде уживање, а не извор на стрес.
