Бесконечно спуштање низ лизгалка, секојдневно одење во парк, детски родендени и монотони рутини со децата може да предизвикаат силно чувство на здодевност кај двата родитела. Таа е нормален дел од родителството и не ја намалува љубовта кон децата, но важно е да си признаете себеси дека некои делови од родителската рутина би сакале да ги прескокнете.
Недостаток на спонтаност и неоптовареност
Монотонијата на првите години од мајчинството е исцрпувачка на многу нивоа. Повторувачките распореди и рутини се драгоцени за детето, но со текот на времето тие стануваат здодевни за родителите, особено за мајките кои почесто остануваат на родителско отсуство.
Жените со тага се сеќаваат на периодот пред мајчинството во кој владеело неоптоварување и спонтаност, а секој момент на досада, брзо можел да се реши на многу начини.
Ако немате доволно време за себе, не остварувате доволно контакт со луѓе надвор од вашето семејство, целосно сте фокусирани на домашна работа, обврски, плаќање сметки и немате соодветна помош, може да ви се чини дека живеете прилично здодевен живот.
Побарајте и прифатете помош
Како што ги учите децата да пронаоѓаат креативни решенија во здодевните денови, така и за себе морате да најдете начини кои ќе ви помогнат да го надминете чувствата на здодевност.
Никој нема да ве разбере подобро од другите мајки. Најдете друштво на мајки кои ве разбираат, ве прават весели и релаксирани и најдете време за повремено дружење и разговор за теми кои ве мачат.
Излезете од дома, дури и кога најмногу сакате да го поминете денот во пижами. Лесната прошетка, возењето велосипед или трчањето со омилена музика ќе го разбудат животот во вас и ќе ви го олеснат враќањето во рутината.
Побарајте и прифатете помош за да можете да одвоите дел од денот за она што ве исполнува. За некои тоа ќе биде добра книга, за некои физичка активност, одење на кафе или топла бања во тишина.
Осмелете се понекогаш и направете мала промена во вашата поставена рутина. Рутините се прекрасни и корисни, но кога ќе престанат да ни служат, важно е да ги ревидираме.
