Импетигото е многу заразна инфекција на кожата која главно ги зафаќа доенчињата и децата. Обично се појавува како чиреви на лицето, најмногу околу носот ии устата на детето. Постои поголема веројатност од развој на инфекцијата ако кожата е веќе иритирана со други кожни проблеми, како што се егзема, убод од инсекти, исеченици или гребаници.
ШТО Е ИМПЕТИГО И КАКО ДА ГО ПРЕПОЗНАЕТЕ?
Импетиго е бактериска инфективна болест на површинскиот слој на кожата која најчесто се јавува во детската возраст.
“Импетиго може да предизвикаат хемолитичкиот стрептокок или златниот стафилокок, како и двата причинители заедно. Инфекцијата најчесто се пренесува со контакт со болно лице, како и со автоинокулација со болна кожа или носна слузница“, објаснува дерматологот проф. д-р Лариса Масари.
- Кои се клиничките знаци и каков е текот на болеста?
Болеста обично се јавува на лицето и тоа околу устата или носот, како и на образите и челото, но може да се јави и на кожата на останатите делови од телото, како што се дланките, подлактиците, трупот и потколениците. Се манифестира во две форми: како везикулозна форма која почесто е предизвикана од бета-хемолитичка стрептокока или булозна форма што ја предизивикува златниот стафилокок.
Двете форми започнуваат со црвенило на одреден дел од кожата на кој се појавуваат гнојни меурчиња или поголеми меури со дијаметар од неколку сантиметри, по чие пукање остануваат влажни ерозии и жолто-златни красти. Со сушење и паѓање на крастите, доаѓа до заздравување без лузни.
Импетигото може да се појави на било кој дел од телото, но најчесто се јавува во пределот на устата и носот, како и околу задникот и на рацете.
- Колку трае?
Импетигото во поголем процент е болест со благ карактер и добра прогноза, која со терапија трае 10-тина дена, додека спонтаната санација може да настапи за 2-3 недели. Сериозна компликација на импетигото е импетиго нефритис.
Се појавува во период од 18-21 ден по појавата на промените на кожата. Затоа е потребно да се направи преглед на крвта и урината. Во случај на појава на температура, болки во грбот или стомакот, треска, протеинурија во урината, задолжително треба да се посети лекар, напоменува проф. Масари.
- Како се лекува?
Во повеќето случаи доволна е локална терапија. Со механичко отворање на меурите, како и отстранување на крастите со антисептични облоги и детско масло, кожните промени се третираат со антибиотски креми два пати дневно во тек на 7-10 дена.
